Siaha-a INC candidate tur N Chakhai ; Mi tling ngei tur candidate kan nei dawn - Lalsawta

Mizoram Pradesh Congress Committee (MPCC) president Lal­sawta chuan, kum 2023 inthlanah Congress party-in hautak lo takin ram tana hna thawk thei tur leh mi tling ngei tur candidate an neih dawn thu a sawi a; kum 2023 inthlanpuia Siaha biala Congress candidate tur chu N Chakhai a nih thu a puang.

Lalsawta hian nimin khan Siaha College Venga Laila Hall-ah Mara District Congress Commi­ttee (MDCC) General Assembly vawi 22-na a hmanpuinaah thu sawiin, kohhran mi leh neutral tam takin kum 2023 inthlanpui an thlir thu a sawi a, "Nakkum inthlan turah Congress party chuan hautak lo takin, ram tana hna thawk thei tur, mi tling ngei tur candidate kan chhawp chhuak dawn a, an retheih avangin kan hnâwl ngawt dawn lo," a ti.

MPCC President chuan, "Party dangte'n inthlana chak zawk nih tumin cheng nuai 200/300 an rinchhan dawn. Keini chuan kut fai leh thinlung thianghlim takin inthlan kan hmachhawn dawn a, pawisa chakna tihhlum kan tum," a ti a; chutiang a nih theih nan leh ram leh hnam tana hna ṭha an thawh theih nan MLA candidate-te tihautak lo turin mipui a ngen.

Mara ram tana hna thawka an buai laiin MADC-a BJP MDC ṭhenkhat leh MNF MDC ṭhenkhatte'n mipui an barakhaih tih sawiin, "He thil thlengah hian Congress chu kan buai lo. Congress MDC-te a hma angin nghet takin an la ding reng a ni," a ti.

MPCC President hian kum 2023 MLA General Election-ah Siaha biala Congress party candidate tur chu N Chakhai, MCS (Rtd) a nih thu a puang a, a tlin ngei theih nan theihtawp chhuahpui turin Mara mipui a sáwm a ni.

MPCC vice president Lal Thanzara pawhin thu sawiin, "Congress party hi Kristian sakhaw humhalhtu, hnam tlem zawkte humhalha chawi kângtu a ni a, a dintu pawh Kristian pachal a ni. Mizorama remna leh muanna, Mizoram buaina chinfelna tura Pathianin a thlan chu Congress party a ni," a ti a; Mizorama hnathawh lian, ro tling zawng zawng deuh thaw chu Congress party hnathawh niin a sawi.

Lalthanzara chuan, "MNF party hi independence sual a, chhuṭi là awm chhun an ni. Zalenna sual tam tak an tláwm lo a, a tláwm awm chhunte'n tunah MNF an kalpui a, an sorkar hnuah hel an inlar a, ram a rálmuang lo. "MNF-in Rs 3,00,000 an tiam a, Rs 25,000 an sem thei hrâm. MNF sorkarin sorkar awm leh tur tana a present awm chhun chu leibá a ni," a ti. ZPM party chhungah buaina tam tak a awm thu leh sorkar ṭha siam aiin sorkar hrim hrim an tum nia a lan thu a sawi bawk.

Inkhawmah hian Congress party zawm thar mi 240 lawm luh an nih thu, MPCC thuchhuah chuan a tarlang.