CM thusawi a hlawhtling thei lo hi beidawnthlak a tling tawh - Zodintluanga

Congress Legislaturte Party (CLP) leader Zodintluanga Ralte, MPCC treasurer ni bawk chuan, chief minister Zoramthanga thusawi a hlawhtling thei lo chu beidawnthlak a tlin tawh thu a sawi a; Mizorama sorkar tawhah Congress party aia hmasawnna thlen nasa an awm lo niin a sawi bawk.

Zodintluanga Ralte hian nimin khan a bial chhunga New Sachan leh Marpara khuaa vantlang inkhawmah thu sawiin, "Kum li kal ta chhung khan Chief Minister thusawi engmah tih hlawhtlin a awm lo a, CM thusawi a hlawhtling thei lo hi beidawnthlak a tling tawh," a ti.

CLP Leader chuan, "Mau/raw chìn duh zawk vanga IAS hna bànsan an la awm lo mai ni loin, tun kum li chhung hian mau/raw hmun nei thar leh tuipui thar an awm hriat a ni lo," a ti. "Aizawl hi traffic jam awm lohna khawpuiah kan siam dawn e, a ti a, Covid-19 lèn vanga lockdown puan a nih lai kha traffic jam awm lohna khawpui kan nih teuh ber lai a ni," a ti a; Congress sorkarin Aizawl khawpui mil tâwk two wheeler tax permit an pek laiin, MNF sorkarin a sâng tél permit an pek thu a sawi.

CM Zoramthanga'n kawng chhâwng leh lei verh a tuipui hle tih sawiin Zodintluanga chuan, "A suangtuahna a puan zung zung ang hi hlawhtling nghal zel thei se chuan Mizoram hi nasa taka hma kan sawn theih a rinawm. CM ber thusawi tihhlawhtlin a la awm lo hi a beidawnthlak hle a ni," a ti.

MPCC Treasurer chuan, "Congress sorkar laiin Mizoramin hmasawnna hmél nasa taka hmuh ṭhin a ni a, Congress party aia hmasawnna thlen nasa an awm lo," tiin, Congress sorkar laia hmasawnna hna thawhte a sawi lang a; chutih rualin, tih dik tâwk loh tam tak an nei thei tih sawiin, an thil tih dik tâwk loah mipui ngaihdamna a dil a ni.