KHAWTHLIR

Meth man
Aizawla hmunpui nei Assam Rifles leh Excise & Narcotics department mite chuan November 27, Thawhṭanni zan dar 10 vel khan Aizawl By-Pass Road-ah methamphetamine mûm 10,000 an man a, a neitua puh mi pahnih, Myanmar lam mi ve ve an man bawk. Meth an man hi Rs 3,33,30,000 hùa chhût a ni.

Dy Speaker-in Hnathawh enfiah
Assembly deputy speaker Lalrinawma chuan nimin khan a bial, Tuikum constituency-a Tlungvel khuaah Eklavya Model Residencial School sak mek a tlawh. Eklavya School hi cheng vbc. 24 sénga sak niin, thla 24 chhunga sak zawh tur a ni a, contractor chu V Lalengzauva a ni.

Ruantlang H/S jubilee
Ruantlang High School chuan nimin khan an sikulah kum 50-na, golden jubilee an lawm a, bialtu MLA leh minister of state TJ Lalnuntluanga'n a hmanpui. Ruantlang H/S-ah hian zirtirtu pakua, thawktu dang pahnih leh zirlai 107 an awm mek a ni.

CADS tanpui
Myanmar ram chhunga pawl pakhat, Hualngoram Peoples Organisation hruaitute chuan nimin khan Central YMA hnuaia ruihhlo dotu, Central Anti Drugs Squad (CADS)-te'n ruihhlo donaa an hman turin Central YMA hruaitute hnenah Rs 1,00,000 an hlân.

Taxi intlàn chhâwk
Aizawl Traffic SP Rodingliana Chawngthu chuan, taxi (LMV)-te intlàn chhâwk hun, zing dar 9:30 aṭanga tlai dar 5 inkara kalpui mek chu traffic enkawlnaah leh lirthei hmangtu mipui tan ṭha zawka hriat a nih avangin thu leh awm hma chu kalpui chhunzawm tur a nih thu a tarlang.

MLA-in lei hawng
Lunglei High Powered Committee vice chairman Lawmawma Tochhawng, MLA chuan nimin khan Zawlpui, Lunglei district-ah Saithah zau panna Kau luia lei (suspension bridge) a hawng. Lei hi HPC sum nuai 13.86 hmanga dawh a ni.

MJA Charity Fund
MJA General Head­quarters chuan kumina Krismas pualin mi harsa zawkte ṭanpuina atan Charity Fund a kalpui leh dawn. MJA Charity Fund-ah hian mahni remchan ang ang thawh khawm turin MJA member-te an ngen bakah, MJA member ni lote tan pawh thawh theih a nih thu an tarlang. Sum thawh khawmte chu Civil Hospital Aizawl Poor Fund-ah pek an tum a, sum awm dan azirin hmun dangah pek tel an tum bawk.

Health Mela
Khawzawl District Hospital-ah nimin khan a thlàwna inentirna Health Mela buatsaih a ni a; mi 110 an inentir. Damdawi mamawhte hnenah a thlawnin damdawi pek a ni.

Gas home delivery
Khawzawl bawrhsap CC Lalchhuangkima hoa nimina thuneitute DC conference hall-a ṭhukhawm chuan, eirawngbawlna gas mahni kawtkaia chah thlen theihna, LPG Online Refill Booking & Home Delivery chu December 1, 2022 aṭanga kalpuina turin Khawzawl Lungvar leh Arro an thlang a, "Veng danga kalpui dan tur chu January 2023-ah rèl leh ni se," an ti.