Hripui vei Aizawl dist-ah chiah an awm

November 28, Thawhṭanni khan Mizoramah Covid-19 vei mi pakhat hmuh chhuah a ni. Nimin khan hripui vei dam tawh mi pahnih chhuahtir an ni a, hripui vei enkawl lai mi paruk chiah awmin, Aizawl district-a mi vek an ni.

IDSP aṭanga thu dawn danin, November 28 khan swab sample 183 endik a ni a, positive pakhat hmuh chhuah chu Aizawl district-a mi a ni a, positivity rate 0.55% a ni.

Mizoramah swab sample 19,91,542 endik tawh niin, Covid-19 vei 2,38,951 hmuh chhuah a ni tawh a, a pumpuia positivity rate 12% a ni. Nimin tlai dar 3 thlengin mi 2,38,219 (99.69%) chhuahtir an ni tawh a, mi 726 (0.30%) thi tawhin, enkawl mek mi paruk (0.01%) an awm.

Nimin tlai dinhmun angin, Mizoramah Covid-19 positive mi paruk chiah awmin, Aizawl district-a mi vek an ni a; district dang zawngah hripui vei an awm tawh rih lo a ni.