Vawiin aṭangin Aizawl pumpuiah Gas home delivery kalpui ṭan dawn
Vawiin, December 1 aṭang hian Aizawl khawpui leh district khawpuiahte eirawngbawlna gas mamawhte an inah ngei pek (home delivery) a ni tawh dawn a, hei vang hian, home delivery kalpuinaah chuan common point delivery (delivery/distribution point)-a gas sem tihtawp a ni dawn.
Gas home delivery kalpui leh distribution point-a sem tihtawp chungchangah hian Mizoram Indane Distributor Association chuan, "FCSCA Secretary Notification No. B. 12013/4/2022 -FCSCA Date 01.11.2022-in a chhuah angin, Aizawl Municipal area-ah leh district headquarters-ah 01.12.22 aṭangin LPG distributor-te'n home delivery an kalpui a ngai tawh dawn a. Chuvangin, refill booking titute hnenah chauh gas pek tur a nih tawh dawn avangin, consumer-te'n refill booking ti ṭheuh tawh turin kan inhriattirin kan inngen. Home delivery kalpuina huam chhungah chuan common point delivery tih tawh loh tur a ni," an ti.
Aizawl khawpui pumpui leh district khawpuia veng ṭhenkhata gas home delivery kalpui ṭan a nih tur leh Aizawlah chuan distribution point-a sem tihtawp a nih tawh dawn laiin, gas la tura tih dan turah mipuia hriattirna leh puanzarna a ṭha lo hle niin thu dawnna chuan a sawi.
Gas agency pakhat hotute chuan Vanglaini palai zawhna chhángin, gas chah tura online refill booking tihna tur phone number an hriat loh thu an sawi a, "SMS, WhatsApp leh misscall-in booking a tih theih a, mahse, tihna tur number kan hre mai lo, Mizoram Consumers' Union lamin an hria ang," an ti.
Vanglaini palai zawhna chhangin Mizoram Consumers' Union (MCU) hruaitute chuan, refill online booking tih dan turah sorkarin mipui zirtirna a la nei ṭha lo deuh nia an hriat thu an sawi a; chutih rualin, chanchinbu leh TV-ah advertisement hmanga puanzar dan tur an ngaihtuah mek nia an hriat thu an sawi.
GAS ONLINE BOOKING TIH DAN TUR
1) Registration la ti lo tan tih phawt a ngai.
2) 7718955555-ah call tur a ni a, tih dan tur an sawi angin registration tih tur.
3) SMS-in registration a tih theih, consumer ID (digit 16) chhut zawhah space dah a, Aadhaar no. tawp lama number pali chhut luh leh a, 7718955555-ah thawn tur.
4) 8454955555-ah miss call hmangin book theih a ni, miss call chauh a tâwk.
5) WhatsApp hmangin 7588888824-ah REFILL tih thawnin a book theih.
6) IndianOIL ONE application hmangin booking a tih theih a, website hmangin tih theiha ni bawk.
7) Booking tihna tur phone number leh consumer number thlun zawm (link) ngei ngei a ngai.
8) Gas man pek lawk theih a ni a, ina an rawn dah hunah pek theih a ni bawk. Ina dah man (delivery charge) chu Rs 70 aiin a tam tur a ni lo.
(Note: Online booking tih dan tur tarlan hi MCU-in an tarlan ang a ni)