Zoram Harh Rawh Campaign pualin Hnam làm leh zai intihsiak buatsaih

Mizoram State AIDS Control Society leh Central YMA-in HIV/AIDS dona atana Zoram Harh Rawh Campaign puala hnam zai leh làm intihsiakna an buatsaih chu November 29, Thawhlehni zan khan Aizawl district bik tan CYMA Hall-ah neih a ni a, Aizawl bawrhsap Dr Lalhriatzuali Ralte-in a hawng. District tina pakhatnate vawiinah an intihsiak leh dawn.

Zoram Harh Rawh Campaign hi Mizorama district hrang hrangah neih a ni tawh a, nimina Aizawl district intihsiakah hian Vaivakawn Branch YMA pakhatna an ni. District tina ti ṭha berte chu state huapin vawiin hian Aizawlah an intihsiak leh ang.

Intihsiak hawnna inkhawm hi CYMA assistant secretary Prof. Malsawmliana'n a kaihruai a; Dr Lalhriatzuali Ralte chuan, India ramah HIV/AIDS punna rate a hniam zawnga a kal laia Mizoramah a pung chho zel chu mi tam tak mak tih a tlin thu a sawi a, "Zoram Harh Rawh tiha Zoram tih hian min huam vek. AIDS hi inchiu ṭhin leh nawhchizuarte chauh natna a ni lo a, mi tu pawhin fimkhur tâwk loh vanga an kài theih a ni," a ti.

Aizawl Bawrhsap chuan, HIV hmuh dan leh do dan thlak a pawimawh thu sawiin, kalkhawmte chu intihsiak tur ringawta kal ni loin, HIV dona campaign bul ṭantu ni turin a sáwm a; HIV veite enhranna leh thinhrikna paih bo a, anmahni ṭanpuitu nih a pawimawh thu a sawi bawk.

MSACS hnuaia DAPCU district programme manager Dr R Zonunmawii tarlan danin, kum 2020-a HIV darh dan tur chhûtnaah India rama puitling kum 14-49 inkar zingah HIV vei zat 0.22% a nih laiin, Mizoram chu 2.37% a ni a, India rama state leh union territory zingah sang berin, India rama HIV hluar berna a ni. Aizawl district bikah chuan district mipui zawng zawng zinga 3.99% chu HIV vei anga ngaih a ni a; HIV inkai chhâwn nasatna ber chu mipat hmeichhiatna a ni.