Ram leh hnam boral lohna turin mi tinin chhungkuaah bul ṭan ṭhat a ngai - Speaker

Assembly speaker Lalrinliana Sailo chuan nimin khan a bial chhunga Luangpâwn khaw kum 50 tlin lawmna leh haw rûnpui a hmanpui a; ram leh hnam boral lohna turin chhungkuaah mi tinin bul an ṭan ṭhat a ngaih thu a sawi.

Lalrinliana Sailo chuan, ram leh hnam hmasawnna tur leh hma lam pana a kal zelna turin thiamna mai a tâwk lo tih sawiin, "Mizoram hian mi ṭha, rinawm, dik, ram leh hnam tana mahni inpe tak takte a mamawh tawh tak zet. Ram leh hnam boral lo turin chhungkuaah mi tinin bul an ṭan ṭhat leh a ngai a ni," a ti.

Tunlaiah social media hman dik lohnain Mizoram a tuam meka a hriat thu sawiin Speaker chuan, "Mi ṭhatna lai hmu thei rêng rêng lo, sawisel tur zawng, mi nihna bak baka sawichhiate an pung nasa a, hetiang lakah hian fimkhur a ngai hle," a ti a, mi ṭhatna lai hmu thiamtu nih a pawimawh thu a sawi.

Lalrinliana Sailo chuan, Mizo nun ze mawi chhawm nun kawngah nasa zawka ṭan la turin Luangpawn khaw mipui a chah bawk. Speaker hian Luangpawn khuaa kum 70 chung lam leh vohbikte hnenah thilpek a hlan a ni.