Aizawl district-a khaw fai ber Maubuang

Swachhata Hi Seva puala Aizawl district-a khaw fai thlanna result chu nimin khan PHE conference hall-ah puan a ni a, Aizawl district-a khaw fai berah Maubuang thlan a ni.

Result puanna leh lawmman semnaa khuallian Aizawl DC Dr Lalhriatzuali Ralte chuan, hman khat daih sarâng (single use plastic) khap a nih tawh thu leh National Green Tribunal an khauh sawt thu a sawi a, "Tih tur an rawn tukte kan zawm ṭhat a ngai tawh hle a, uluk taka min vil zui reng avangin zâwm ṭha lo state an hrem ṭhin," a ti a; hman khat daih sarâng chu ram leilung tan a ṭhat loh avangin hmang lo turin Krismas leh kumthar thleng tura ruai buaipuitute a chah.

Fai turin tui hnianghnâr a ngai tih sawiin Bawrhsap chuan, "Tuihna humhalh leh tui renchem kan ngaih pawimawh a ngai," a ti a; ei leh in sâwngbàwl-naah thianghlimna zir thar zel a ṭul thu a sawi bawk.

Aizawl district-a khaw fai thlannaah Maubuang khua chu pakhatna a ni a, pahnihna Sailam niin, pathumna Sailutar a ni. Sawleng leh Muthi khuate'n consolation prize an dawng.