Robert-a'n a biala hna thawhte a tlawh

Minister of state Robert Romawia Royte chuan nimin zing khan a bial chhunga New Market in sak ṭhat hna thawh mek leh thlai zuartute harsatna a hmunah a en a; 1st MAP Ground, Armed Venga phûl lem phahna tura hnathawh kal mek a enfiah bawk.

Robert Romawia hi Aizawl Smart City chief executive officer Rothanga leh contractor Lushai Engineers hotute'n an ṭawiawm a; New Market-a Thlai Zuar Joint Association hruaitute leh Dawrpui khawtlang hruaitute nen an inkàwm a ni.

New Market Thlai Zuartu Joint Association-in an ngen angin, lirthei leh mipui kalna zau zawk leh thlai zuartute'n Krismas leh kumthar vuakvêtah mipui mamawh an phuhrûk theih nan contractor-te'n hna an thawhna chin an hungna chu sawn hret se a duh thu Robert Romawia chuan a sawi a; Smart City hotute leh contractor pawhin a hungna hi zanah sawn nghal a nih tur thu an sawi.

Minister chuan, New Market chu mipui tan a pawimawh em avangin, ṭha taka hna thawk a, a hun taka zo turin contractor a chah a; dawr hmun ṭha zawk an neihna tur a ni tih hriaa dawhthei taka nghâk turin New Market-a sumdáwngte a ngen bawk.

1st MAP Ground a tlawhnaah Robert Romawia chuan, khelmual siam mek an enho chu sorkarin langtlang veka thil tih a duhzia lantirtu a nih thu a sawi a; hnathawhte a remchan dan anga vil turin khawtlang hruaitute a ngen bakah, chak taka thawk turin contractor a chah a ni.

Sports Minister chuan field cheiṭhat mekah technology thar hman a nih dawn thu sawiin, "He technology thar hi mithiamte'n an zirchian hnuah hman turin thutlukna kan siam a ni. FIFA pawhin he technology thar hi a dah sang hle," a ti a, lei chetna vengah chuan field laia pipe phum chu a him loa an hriat thu a sawi.

MSSC leh Company hotute sawi danin, rora chunga geomembrane phah a ni dawn. Hetah hian tui a tlang thei loh avangin field chhungah tuilut a awm dawn loa, a sir tawn tawna pipe dahah tuite chu luangkhawmin, field hnung lama drain siam aṭangin a luang chhuak dawn a ni.

Armed Veng khelmual tlawhnaah hian Mizoram State Sports Council secretary John Ṭanpuia, Armed Veng Local Council member, Armed Veng YMA leh Armed Veng FC hruaitute leh engineer-te leh contractor-te an tel.

Sorkar thuchhuah tarlan danin, 1st MAP Ground hi football khelmual puitling lenna khawp aia a têt deuh avangin a sir dung tluanin, ft. 413-a sei leh a vâng ft. 56-a zauin a chhâwnga sak a ni.