ZPM hi kut hnathawktute ṭhian a ni - Lalduhoma

ZPM leader Lalduh­oma chuan, "ZPM hi kut hnathawktute ṭhian a ni a, hand holding policy kan nei," tiin, eizawnna atana bul ṭanna nei lote'n bul an ṭan theih nan an bánah an kaih dawn thu a sawi.

Lalduhoma hian nimin khan Tuikum bial chhunga Lungpho community hall-a vantlang inkhawmah thu sawiin, "ZPM hi kut hnathawktute ṭhian a ni a, hand holding policy kan nei a, bul ṭanna nei lote'n bul an ṭan theihna turin an bânah kan kài dawn. Mahni chhungkua ṭheuhin eizawnna atana kan duh, kan thiam záwngte bul kan ṭan theihna turin bul kan ṭansak dawn a ni," a ti.

ZPM Leader chuan, hand holding policy chu sem policy nen a inang lo tih sawiin, "Sem policy chu a inzatin an sem tawp mai a, eng trade nge, eng project nge enfiah pawh a awm lo. An party-a mi lak luh nan leh vote zawn nan an hmang a, development a ni lo a, vote zawnna hmanrua mai a ni," a ti a; ZPM chuan bul ṭanna nei lo, ṭanpui tlâk ṭanpui nan hand holding policy an duan thu a sawi.

Lalduhoma chuan, "Ram hruaitu rêng rêng Pathian leh mipui hmaa an thutiam bawhchhia te, a zuitu mipuite’n kan kalsan chuan term khat bak ro an rél thei lo. Zoramin hun thar kan chuang kai mek," a ti a; MNF leh Congress party mite chu ZPM-ah tel a, Mizoram siamṭhat hna thawhpuiah a sáwm.

ZPM chu mipui movement, mi zawng zawng tana din a nih thu sawiin Duhoma chuan, "Political party hi an hun a liam tawh chuan khawtlang, bial leh ram tante rawngbawl a harsa tawh ṭhin. Tunah chuan ZPM hun a her chhuak ve ta tih hi kan pawm thiam ka beisei," a ti a, neutral thinlung pu tam tak, party-a inziah luh kher ngai ti lo, mahse, ZPM an sorkar loh hlaua theihtawp a beitu mi tam tak an awm thu a sawi.

Lalduhoma chuan, ZPM-in Mizoram chhanchhuahna turin mithiamte nen policy an duang tih sawiin, "Kan policy tam tak hi tihlawhlting tur chuan power kan mamawh. Brig. T Sailo ang kha chief minister-ah nei reng ila chu power-ah hian kan intodelh tawh kan ring a, Pu Ṭhena policy kha tihlawhtling turin theihtawp kan chhuah dawn a ni," a ti.

ZPM thuchhuah chuan, Lalduhoma hian Lungpho, Ngentiang leh Thinglian khuaa ZPM zawm thar mi 137 a làwm lut niin a tarlang.