Inthlanah kan mal ṭan dawn lo - Lalsawta ; South Tuipuia INC candidate tur Laldintluanga
Mizoram Pradesh Congress Committee (MPCC) chairman Lalsawta chuan, kum 2023 inthlanah South Tuipui biala an candidate tur chu C Laldintluanga, Hnahthial a nih thu nimin khan a puang a; kum 2023 inthlanah Congress party an mal ṭan dawn loh thu a sawi.
Lalsawta hian nimina South Tuipui Congress Block special meeting-ah thu sawiin, "Kum 2023 inthlanah Congress party hi kan mal ṭan dawn lo, dik leh fel taka kan tih chuan Pathianin min pui dawn tih kan ring ngam. Congress kan sorkar chuan hlemhlêt duh mahse an hlemhle dawn lo, ei ru turin chance an nei dawn lo," a ti.
Dik lo taka sum ngah chu phurrit mai a nih thu sawiin Lalsawta chuan, "Hmãna tih dan aia ṭha zawk, mi dangte leh ram tana thil ṭha zawk siam hi kan tih tum a ni. Congress party chuan ram chhe zel tur dinhmuna a din kan remti lo," a ti a; tu leh fate tana ram ṭha leh nuam zawk din an tum thu a sawi.
Congress President chuan, sum leh pai hmanga mipui lei theiha inngaihna an dodal zel dawn thu sawiin, "Pawisa hmanga inleitir hi ram hralhna a ni. Isua thisen chauha lei kan ni a, candidate leh political party-te'n lei theiha an ngai che u a nih chuan i zahawmna humhim tur leh sorkar ṭha siam tura lo dodal turin ka ngen che u," a ti a; sum leh pái hmanga inthlêmna dodal chu Election Commission, kohhran leh MPF-te duh dan a nih thu a sawi bawk.
MPCC vice president Lal Thanzara pawhin thu sawiin, Congress party-a haw rûnpui a thleng mek niin a sawi a, "Mi ṭha tak takin Congress an zawm mek zel. Ram leh hnam hmasawnna hna thawk tura mi ṭha kan sàwmte pawhin kan CM candidate Pu Lalsawta an enin zui atana an duh a nih avangin an hnar ka ring lo," a ti.
Lal Thanzara chuan, tunah chuan CM a lan apianga nuih tumna hri léng tihreh a ṭul thu sawiin, "Kamrula te hoin cabinet minister nih theihna chance an neih sàn em emna party hi Mizoram mipui tan pawm reng chi a ni lo," a ti. Hmun hrangah ZPM party hruaitute'n ZPM aiin Congress party an thlang zawk zel tawh niin a sawi bawk.