ACB-in thubuai min siamsaknaah sum pelhé pakhat mah a awm lo - John Rotluangliana

Tourism minister hlui John Rotluangliana chuan, Anti Corrup­tion Bureau (ACB)-in a laka thubuai an ziah luhnaah sum pelhé cheng khat pawh a awm lo niin a sawi a, "Hetianga inchhaih buai reng ai chuan CBI chhuitir zawk mai rawh se," a ti.

Congress party-in sorkarna an chelh laia Tourism minister ṭhin John Rotluangliana chuan, an hun laiin Khawzawl Tourist Lodge sak zawhna atan NEDP hnuaiah cheng nuai 67.49 ruahman a nih thu sawiin, "NEC lamin Khawzawl Tourist Lodge atana kan sum dil min pek leh theih tâk si avangin NEDP sum hi thil dangah hman a ni," a ti a, Tourist Lodge chu sak zawh vek a nih tawh thu a sawi.

NEDP hnuaia sum dah cheng nuai 67.49 chu contractor bill la thei lote hnenah pek vek a nia sawiin John Rotluangliana chuan, "ACB lamin contractor-te hi an ko a, an sum dawn zat leh NEDP hnuaia kan sum dah hi a inmil thlap a ni. ACB lam hian an signature pawh an la thlap. ACB lam chuan eng mah thubuai chhui zui tur pawh a awm loh thu an sawi," a ti.

John Rotluangliana chuan, thubuai chungchang chu a hriat zui tawh loh thu sawiin, "ACB lam ka zawh chuan Lokayukta lamin full investigation ti leh tura an tih thuin min chhang. A mak ka ti khawp mai, ACB lam pawhin chhui zui ngaia an ngaih tawh loh laiin," a ti a; thubuai siamsak a nih chungchang chu amah hriattir a la nih loh thu a sawi.

Thubuai siamsak a nihnaah sum pelhé a awm lo nia sawiin Rotluangliana chuan, "Kei leh ka thawhpuite'n cheng khat pawh kan tipelhé lo. Hetia tikual vel lo hian, an duh chuan CBI chhuitir mai rawh se, kan ngam," a ti.

Tarlan tawh angin, Lokayukta chuan Khawzawl Tourist Lodge sak zawk loh a nih chungchangah May 24, 2019 khan complaint an dawng a, an zir chian hnuah chhui chiang turin May 24, 2019 khan ACB an hriattir. ACB-in an chhui chianna chu February 5, 2020 khan Lokayukta-ah an thehlut a, chhui zui leh turin ACB chu February 27, 2020 khan hriattir leh an ni.

Thubuai hi Lokayukta chuan March 21, 2022 khan a ngaihtuah a, chumi hnu May 13, 2022 khan full investigation ti turin ACB a hriattir. ACB-in full investigation an tih mek laiin Tourism minister hlui John Rotluangliana leh Tourism director hlui Biakthanmawia Pautu lakah thubuai ziak luh a ni.