Adhoc aided school-te'n sorkarin a lak theih nan na taka sorkar nawr an rêl

Mizoram Government Adhoc Aided Teachers Union (MIGASTU) chuan, an sikulte sorkarin a lak (provincialise) ngei theih nan na takin Mizoram sorkar nawr an rêl.

MIGASTU hruaitute hi nimin khan an ṭhukhawm a; an sikul, adhoc aided school-te chu MNF kaihhruai Mizoram sorkarin provincialise dinhmuna a hlàn kai ngei theih nan a huhoa hmalak an rél a; "Min duhsaka dinhmun sang zawka min hláng kai ṭhintu Pu Zoramthanga kaihhruai sorkar a ding leh ta hi kan lawm hle a, beiseina sang tak kan nei hman a ni. Amaherawhchu, kan chanvo tur dik tak provincialise status pek loha kum tam tak kan awm ta hi hrehawm kan ti tak zet a ni," an ti.

MIGASTU chuan, anni anga regular ni lo zirtirtu senior fál an awm tawh loh thu te, provincialised rules nei sa thlap an nih thu te, provincialise an nih avangin sum sên belh tur a tam tawh loh thute an tarlang a; hengte avang hian sorkar tan provincialise dinhmuna dah chu a harsa lo turah an ngai a ni.

MIGASTU RORELTE
* Provincialise status kan hmuh ngei theih nan na takin sorkar nawr ni se.
* Kan dinhmun dik tak sorkar leh mipui hriatah puangzar turin press conference neih thuai ni se.
* Provincialise kan nih ngei theih nana hma min laksak turin chief minister Pu Zoramthanga hmuh thuai ni se, pangchang takin ngen ni se.