Union Minister-in Lawngtlai a tlawh

Union Housing & Urban Affairs minister of state Kaushal Kishore chuan nimin khan Lawngtlai a tlawh a, Lai Autonomous District Council (LADC) official-te leh tlawmngai páwlte a kâwm.

LADC official-te nen an inkawmnaah Union Minister hi LADC-a deputy chief whip H Lalmuansanga hoin LADC dinhmun tlangpui an lo hrilh a, mamawh an neihte an lo thlen. Lawngtlaia maxicab terminal sakna tur leh project dang an thehluh tawhte chu a theih angin a lo bawhzuisak tur thu Kaushal Kishore chuan a sawi.

Housing & Urban Affairs Minister hian Central Young Lai Association (CYLA), Lai Women Association (LWA) leh Lai Students' Association (LSA) hruaitute nen an inkawmnaah, tlawmngai pawlte chu khawtlang siamṭhatnaa ram innghahna leh sorkar kutke pawimawh ber pakhat an nih thu a sawi a; ṭhalaite suat mektu ruihhlo hman khawlohna, zûk leh hmuam leh zu donaah theihtawp chhuah zel turin a chah.

LWA-in HIV veite enkawlna hmun dinna tur project an siam te, LSA-in New Delhi-a zirlaite hostel sakna tur ram an dilna leh, Mizorama ADC-te dinhmun ṭha zawk pe tura an ngennate chu a ṭul anga bawhzui a tum thu Union Minister chuan a sawi a ni.