Science leh Mathematics zirlaibu Mizo ṭawnga ziah tlangzarh a ni

School Education minister Lalchhandama Ralte chuan nimin khan MBSE conference hall-ah MBSE buatsaih pawl 10 zirlai, Science leh Mathematics zirlaibu Mizo ṭawnga ziah a tlangzarh.

Lalchhandama Ralte chuan, Mizo zirlai tam takin science leh mathematics subject an huphurh bik chhan chu ṭawng an hriatthiam tâwk loh vang leh a nihna an man tâwk loh vang a nih thu a sawi a, "Mizo ṭawnga ziah a nih avang hian zirlai tam takte'n an ngam sawt ang a, an tui phah dawn," a ti a; Mizo ṭawnga zirlaibu siam chu zirlaite'n hma an sawnpui ngei a beisei thu a sawi.

MBSE-a thawkte inpekna ropui a tih thu sawiin Minister chuan, "Mizo leh English inkawpa zirlaibu (bilingual textbook) academic session tharah tihchhuah a ni dawn. Mizoramah syllabus a tê bik lo a, quality education-ah a zahpuiawm lo hle a ni," a ti.

Inkhawmah hian School Education secretary Dr Lalzirmawia Chhangte-in zirlaibu lehlinnaa a bultumtu mi 40 hnenah lawmthu sawina thuchei a hlan a ni.

Tarlan danin, National Education Policy duh dan angin MBSE-in May 5, 2022 khan Bilingual Sub-Committee on Secondary Science and Mathematics a din a; MBSE officer-te leh Sub-Committee member-te'n workshop vawi-40 neiin, bilingual textbook an buatsaih a ni.

Pawl 10 mathematics leh science zirlai, Mizo ṭawnga ziah chu Mizorama sikul tina hman turin peih a ni tawh a; academic session thar aṭangin secondary school-ah English leh Mizo ṭawng inkawp (bilingual) zirlaibu hman theih turin hmalak mek a ni bawk.