Covid-19 vei enkawl lai mi 6 an awm

November 29, Thawhlehni khan Mizoramah Covid-19 vei mi pakhat hmuh chhuah a ni a, nimin khan hripui vei dam tawh mi pakhat chhuahtir a ni. Hripui vei enkawl lai mi paruk an awm mek a, Aizawl district-a mi vek an ni.

IDSP aṭanga thu dawn danin, November 29-a Covid-19 positive pakhat hmuh chhuah chu Aizawl district-a mi a ni a, swab sample 133 endik niin, positivity rate 0.75% a ni.

Mizoramah swab sample 19,91,675 endik tawh niin, Covid-19 vei 2,38,952 hmuh chhuah a ni tawh a, a pumpuia positivity rate 12% a ni. Nimin tlai dar 3 thlengin mi 2,38,220 (99.69%) chhuahtir an ni tawh a, mi 726 (0.30%) thi tawhin, enkawl mek mi paruk (0.01%) an awm.

Nimin tlai dinhmun angin, Mizoramah Covid-19 positive mi paruk chiah awmin, Aizawl district-a mi vek an ni a; district dang zawngah hripui vei an awm tawh lo a ni.