KHAWTHLIR

Krismas puala Thisen pek
Association for Voluntary Blood Donation, MSACS leh blood bank-te chuan December thla chhung zawng Krismas puala thisen pek an huaihawt dawn a, vawiin hian Civil Hospital, Aizawlah a hawnna hun hmang a ni ang. Mahni remchânna ber blood bank-ah pek theih a ni a, thisen petute hnenah ei leh in pek zel a ni ang. AVBD chuan Krismas puala thisen pe turin Mizoram ṭhalaite an sáwm a ni.

Pàwlráng jubilee
Pàwlráng khua chuan nimin khan khaw thar an din kum 50-na, golden jubilee an lawm a, bialtu MLA Dr L Thangmawia'n a hmanpui. Pawlrang khua hi kum 1902-ah din niin, kum 1968-ah Changzawlah sâwikhawm an ni a; tuna an khaw thar chu kum 1972-ah din a ni.

Sadbhav Mandav
Mamit bialtu MLA H Lalzirliana chuan nimin khan Bawngva khuaah Mini Sadbhav Mandav (Multipurpose Community Centre) a hawng. MLA hian Bawngva khawtlang hruaitute hnenah silpauline, thingpui no, dekchi, football, volleyball, jersey leh khawtlang mamawh thil dang a pe. Community Centre hi NITI Aayog aṭanga hmuh cheng nuai 50 hmanga sak a ni.

Minister-in hawng
Mizoram Judo Association-in 25th Mizoram Judo Championship 2022 an buatsaih chu nimin khan TNT Centre-ah Sports & Youth Services minister Robert Romawia Royte-in a hawng.

Kudam hawng
Food, Civil Supplies & Consumer Affairs minister K Lalrinliana chuan November 29, Thawhlehni khan New Vervekah supply kudam thar a hawng. Kudam hi NABARD Warehouse Infrastructure Fund (WIF) Project kaltlang hmuh cheng nuai 158.66 hmanga sak a ni a, buhfai quintal 2,000 leng tura ngaih a ni.

Blackberrys Showroom hawng
Zarkawt, Aizawla Blackberrys Showroom, thawmhnaw dawr din thar chu nimin khan minister of state Lalchhandama Ralte-in a hawng.