Zirna lama thawk ṭha Dr Tawnenga Mizo Award 2022 hlan a ni

Mizo Award 2022 chu Mizorama zirna sáng hmasawnna tura thawh hlâwk Dr Tawnenga, Mission Veng hnenah nizan khan HYVE City Hall, Aizawlah hlan a ni.

Vanglaini chanchinbu buatsaih Mizo Award 2022 hlanna inkhawm hi Vanglaini joint editor Lalnghinglova Hmar-in a kaihruai a; Mizo Award dawngtu hnenah Pachhunga University College (PUC) principal hlui Saingenga'n a hlân.

Tawnenga hi May 16, 1953 khan Serkawn, Lunglei­-ah a piang a, a pa chu Lalsawma niin, a nu chu Laikungi a ni. Pawl 7 thleng Serkawnah a zir a, pawl 8 a nih laiin Aizawlah pémin St Paul's High School-ah a zir chhunzawm. St Anthony's College, Shillong-ah B.Sc. a zo a, kum 1977 khan North Eastern Hill University aṭangin M.Sc. (Botany) a zo leh a, kum 1991-ah NEHU aṭangin doctor of philosophy a zo leh bawk.

Dr Tawnenga hian kum 1978-ah PUC-ah zirtirtu hna a thawk ṭan a, PUC-ah hian kum 10 chuang, April 6, 2009 aṭanga February 28, 2021-a a pension thlengin principal a ni. June 1, 2022 aṭang khan Mizoram Christian College principal a ni leh a, tunah hian a la thawk mek.

Tawnenga hi PUC-a a thawh chhung, a bikin principal a nih chhungin a hmaa la awm ngai lo thil eng emaw zatah bul a ṭan a; college-a zirna, inthununna, faina, hun vawn dik, ruhrel din leh thil dang dangah hmuh theihin hma a sawnpui a, NAAC accreditation A+ grade hmu thei khawpin PUC hma a sawnpui a ni. A hun laiin UGC-in College with Potential Excellence-ah PUC a thlang a, National Institutional Ranking Framework chuan India rama zirna sang thiam dan indawt a siamah PUC a lang phak a, kum 2018 khan PUC-in ISO certificate a dawng pha bawk.

PUC-a a sûlhnu ropui takte chu lehkhabu, 'Principal Chhuanawm Dr Tawnenga' tia chhuah tumin PUC-a zirtirtu pahnihin an buaipui mek a ni.

Dr Tawnenga hian a nupui Lalrinpuii nen fa pathum leh tu pasarih a nei a ni.

DR TAWNENGA
1) Mizoram Science Society-ah President a ni tawh.
2) Ministry of Environment and Climate Change hnuaia State Expert Appraisal Committee-ah Chairman a ni tawh.
3) MZU Academic Council leh Executive Council-ah kum 12 chhung member a ni.
4) Mizo ṭawngin lehkhabu pathum a chhuah tawh.
5) A kaihhruainaa Ph.D zo mi pakhat a awm.
6) MZU-a pawl leh academic department hrang hrangah member a ni tawh.
7) NEHU hnuaiah kum ruk chhung Board of Under Graduate Studies member a ni tawh.
8) National Assessment and Accreditation Council-ah Assessor a ni mek.
9) Mizoram Academy of Science-ah Mentor a ni.
10) Mizoram Science Society-ah Adviser a ni.
11) Mizoram Board of School Education hnuaia Exam Committee-ah member a ni mek.
12) Mission Veng YMA-ah hruaitu hlun a ni.
13) Central YMA-ah kum 14 chhung hruaitu a ni.
14) Kum 1997-ah Mission Veng kohhran upa atan nemngheh a ni.
15) Synod Social Front leh Synod Literature & Publication Board-ah member a ni tawh.
16) Kristian Tlangau joint editor a ni tawh.
17) Synod Hospital Board leh Mizoram Synod Nusing College Managing Board-ah member a ni mek.