Baktawnga bél duhtu an la tam ; Duhtute mamawh an siam hneh lo

Chhuanthar, Bak­tawng Tlangnuamah bél an la siam chhunzawm zel a, tun dinhmunah chhungkaw pangain siam mekin, bél duhtu an la tam avangin duhtute mamawh ang an siam hneh lo.

'Baktawng cooker' tia hriat lâr hi Chhuantharah hian a hma chuan chhung­kaw eng emaw zatin an siam ṭhin a, tun dinhmunah chhungkaw panga chiah an siam rih a ni.

Covid-19 léng avanga state páwn lamte nen kum hnih vel an indàwr theih loh avangin bél chhûng ṭhin chhungkaw eng emaw zat chuan bél siam chawlhsanin, in chhung bungraw dang (furniture) siam lamah an kal a, chuvang chuan tunah chuan chhungkaw panga vel chiahin an siam tawh tih Vanglaini palai an hrilh.

Bêl hi Mizoramah ai mahin, state páwnah an hralh tam zawk thu an sawi a, "Nagaland leh Meghalaya-ahte kan hralh tam a, bél lei duhte kan pe hneh loh zawk a ni," an ti.

Chhuantharah hian bél bakah, hmarcha leh sawhbàwl dang sawhna tur an siam ṭhin bawk.