World AIDS Day hman a ni

Nimin December 1 kha World AIDS Day a ni a, Mizoram hmun hrang hrangah hman niin, thupui chu 'Equalize' tih a ni.

Aizawlah chuan World AIDS Day hi Mizoram State AIDS Control Society (MSACS) leh Central YMA bultumin Dawrpui Multipurpose Hall-ah hman a ni a, Mizoram pum huapin hnam làm leh zai intihsiak buatsaih a ni.

World AIDS Day-ah hian HIV/AIDS dona atana buatsaih Zoram Harh Rawh Campaign hnuaiah hnam làm leh zai hmangin intihsiak a ni a, district hrang hranga pakhatna ṭheuhte an inel a, tlaiah khàrna hun hman niin, lawmman sem a ni.

World AIDS Day hmanna leh Zoram Harh Rawh Campaign khârnaah hian Health minister Dr R Lalthangliana khuallian a ni a; khuallian chuan, HIV/AIDS chu ṭhalaite mai ni lo, nu leh pate pawh suattu a nih thu sawiin, "Building ṭha tak, motor tam leh pawisa tam tak pawh nei ila, kan dam hun chhung a rei loh chuan engtihna mah a ni lo," a ti.

MSACS website-a a lan danin, Mizoramah kum 2005 aṭanga March 2022 thlengin mi 8,97,802-te thisen endikah HIV vei mi 25,982 hmuh chhuah a ni tawh a, endik zat aṭangin 2.89% a tling. HIV+ve hmuh tawh zinga 65% vel chu mipat hmeichhiatna hman aṭanga kái an ni a, HIV/AIDS vangin mi 3,506 an thi tawh. HIV+ve hmuh chhuah tawh zinga 17,917-in anti retroviral therapy an la tawh a ni.

Health minister R Lalthangliana chuan, state dangin Kristian ram kan nih avangin ṭha turah min ngai tih sawiin "Ziak leh chhiar thiam tamna ber dawttu kan ni te, ram rálmuang kan nite hi a lawmawm tak zet," a ti a; HIV/AIDS leh cancer lama Mizoram a langsar erawh chu thil chhinchhiah tlak loh tak a nih thu a sawi.

Health Minister chuan, HIV/AIDS chu sorkar, kohhran, tlawmngai pawl leh pawl dangte ṭanhona ṭha aṭanga beih tak tak a nih chuan Mizoram chu HIV/AIDS vei nei tlem berna state a ni thei dawn tih a sawi a, "Kum hnih khatah lekah chuan a ni lo ang, rei lo te chhungin a reh dawn lo a, ṭan mar pát a ngai. HIV/AIDS hi hripui anga reh mai tur a ni lo a, inkai chhàwn zel theih a ni," a ti.

CYMA president R Lalngheta pawhin thu sawiin, Mizote chhiatpui ber ngaihtuah a ngaih thu a sawi a, "Drug-in kan ram ṭhalaite a eichhe mek, zu leh ruihhlo avangin nunna tam tak kan chán. HIV/AIDS-in kan ramah bû a khuar mek. A ṭha zawnga kan ṭan a ngai a ni," a ti a; Mizo ṭhalaite chu ram leh hnam tan an puan ven sâwi chhíng turin a sáwm.

World AIDS Day hi hmun hrang hrangah hman niin, zirlaite pualin intihsiak buatsaih a ni.

Siahaah chuan Don Bosco Higher Secondary School hall-ah hman a ni a, middle school, high school leh higher secondary school zirlaite tan On the Spot Paiting Competition buatsaih a ni. Lemziaka intihsiaknaah hian thupui hrang hrang neiin lem an inziahsiak a, a ti ṭhate hnenah lawmman pek a ni.

Champhaiah chuan GM High School Assembly Hall-ah hman a ni a, bawrhsap James Lalrinchhana khuallian a ni. Day pualin zirlaite tan lemziaka inelna buatsaih a ni a, sikul 22 aṭangin zirlai 102 an tel.

Serchhipah chuan Serchhip Auditorium-ah hman niin, bawrhsap Nazuk Kumar-i'n a hmanpui. High School leh middle school zirlaite tan lem inziahsiak buatsaih a ni a, thupui chu 'Inchiuna inhman ṭâwm ṭhat lohzia' tih leh 'Engtin nge drug kan pumpelh theih ang,' tihte a ni.

Lawngtlaiah chuan Region HSS Auditorium-ah hman a ni a, Lawngtlai additional DC Marilyn Rualzakhumthangi'n a hmanpui. Addl DC chuan, kumin January aṭanga October thla thlengin Lawngtlai District Hospital-a thisen 1,301 endik aṭangin HIV vei mi 65 hmuh chhuah a nih thu leh, chu'ng zinga mi paruk chu nu nau pai an nih thu a sawi. Lawngtlai ICTC hnuaiah kum 2004 aṭanga October 2022 thlengin thisen 22,564 endik tawhah HIV vei mi 398 hmuh chhuah a ni tawh a, an zinga mi 40 chu nau pai an ni.

Khawzawlah pawh Zaingen YMA Hall-ah World AIDS Day hman a ni a, additional DC Lalvenhima'n a hmanpui. Day puala lem inziahsiaka ti ṭhate hnenah lawmman hlan a ni.

Zoram Medical College, AIDS Healthcare Foundation leh Mizoram College of Nursing-te pawhin World AIDS Day pualin zingah ZMC aṭanga MCON thleng rally an huaihawt a, ZMC director Dr John Zohmingthanga'n a vailiam a ni.