Kum 2000 hnu lamah Mizoramah Human trafficking case 35 a awm

Home minister Lalchamliana chuan nimin khan Assembly Annex Conference Hall-ah mihringa sumdawnna dona chungchanga intawhkhawmna, Confe­rence on Anti-Human Trafficking a hmanpui a; kum 2000 hnuah Mizo­ramah human trafficking thubuai 35 ziah luh a nih tawh thu a sawi.

Lalchamliana chuan, mihring hmanga sum­dawnna (human tra­fficking) chu khawvelin a buaipui nasat thu sawiin, "Mizoramah pawh a hluar zel a, mihring dikna chanvo rahbehna lian ber leh sual pawi ber zinga mi a ni. Kum 2000 hnu lamah Mizoramah human trafficking case 35-a awm tawh a, hmeichhia 89 leh mipa paruk chhan chhuah tawh niin, pawikhawihnaa inhnamhnawih mi 64 man an ni tawh," a ti.

Mihringa sumdawn donaah Mizoram police leh tlawmngai pawlte inpekna leh hmalaknate chhuanawm a tih thu sawiin Chama chuan, "Mihringa sumdawnnaah thil sual titute police-te chhui tawh chu a la hlawhtling zel a, NGO leh state dang police-te nen an thawhhona ṭhat vang a ni bawk," a ti a; misual man, court-a hruaia thiam loh chantir chungchangah Mizoram police chu India ramah a ti ṭha pakhatna an nih thu a sawi.

Home minister Lalchamliana chuan, mihring hmanga sumdawnna do turin information inpek ṭhat a pawimawh thu te, a tuartute chhanchhuah bakah, nun pangngaia an nun leh theihna tura chhawmdawl dan tur ngaihtuah a pawimawh thute a sawi bawk.

DGP Devesh Chandra Srivastva pawhin thu sawiin, Mizoram CID-te inpekna fakawm a tih thu a sawi a, "Mihring hmanga sumdawnna hi Mizoramah chuan hmeichhia leh naupang chungah a nasa ber a, retheihna leh chhungkaw harsatna vanga táng an tam ber," a ti.

Mihringa sumdawnna buaipuitute'n hna ṭha zawk pek tiamin ram dangah an hruai a, an bum ṭhin thu sawiin DGP chuan, "Placement company leh pawl hrang hrangte nen ṭangkawpa hmalak a ngai," a ti a; tun hnaia Myanmar leh Bangladesh rambuai vanga ráltlânte chu chhawmdawl leh vên an ngaih thu a sawi bawk.

Intawhkhawmnaah hian Central YMA, MHIP, central KṬP, MṬKP, Salvation Army, MZP, KTP, Young Chakma Association, Salvation Army Youth leh MUP aiawhte an tel a ni.