SCERT-in lawmman chi hrang hrang a sem

State Council of Educational Research and Training (SCERT) chuan nimin khan an auditorium-ah Poetry Festival intihsiaka ti ṭha te, Proficiency Award in English dawngtute leh National Talent Search (NTS) exam-a tlingte hnenah lawmman an hlan.

Poetry Festival hi higher secondary school zirlaite tan kum 2011 aṭangin buatsaih ṭhin a ni a, kuminah chuan November 30, Nilaini khan buatsaih niin, sikul pakua aṭangin zirlai 46 an tel. Mizo HSS-a pawl 12 zirlai C Laltlanhlua chu pakhatna a ni a, a poetry thupui chu 'The uncertain future' tih a ni.

SCERT chuan pawl 10 leh 12 board exam-a English subject-a mark hmu sang zual, top 3-a langte hnenah Proficiency Award in English an hlan a; kum 2022-ah hian pawl 10 zirlai mi 24 leh pawl 12 mi zirlai 24-ten award an dawng.

NTS exam-ah hian Mizoramin seat 50 a nei a, kum 2021-ah khan naupang 50-in exam an hmachhawn a, mi paliin scholarship an dawng a ni.
Award leh lawmman hlanna inkhawma khuallian Human Resource Development board vice chairman Dr L Thangmawia, MLA chuan, Mizo ṭawng leh sap ṭawng ṭan kawptir dan thiam a pawimawh thu a sawi a, "Zirna atan information technology hman ṭangkai a pawimawh a, kan mobile phone-te hi subject hrang hrang zirna atan leh zirtirna atan tun aia ṭangkai leh zuala zirlaite leh zirtirtute'n an hman a ṭul," a ti.

Inkhawm hi SCERT director Laldawngliani'n a kaihruai a, School Education secretary Dr Lalzirmawia Chhangte pawhin thu a sawi a ni.