Thiamna hmang tam leh zual turin Deputy CM-in engineer-te a sáwm

Mizoram Engineering Service Associotion (MESA) chuan nimin khan Berawtlangah Annual General Conference vawi 41-na an hmang. Khuallian deputy chief minister Tawnluia chuan, engineer-te chu kawng ṭha, tui in tur thianghlim leh kawlphetha lama thawk an nih angin, an thiamna leh finnate hmang tam leh zual turin a sáwm.

Tawnluia chuan, engineer-te chu hmasawnna ruhrel thlenna tura sûlsutu an nih thu sawiin, "Thiamna chi hrang hrang neiin, degree sang tak tak pass in, ram tan thiamna hmanga mipui rawngbawl turin sorkar kutke in ni. Kawng ṭha, tui in tur thianghlim bakah, êng awm tura hna thawktu, thluak bûr awm khawm in nih avangin in thiamna leh finnate hmang tam leh zual ang che u," a ti a; thil thar nei turin ngaihtuahna hman tam a pawimawh zual thu a sawi.

MESA-a tel PWD, PHE leh Power & Electricity department-a engineer- chu hnathawh ṭhatah inelna thianghlim siam ṭhin turin a chah a, sorkar hnathawk an nih angin, sorkar neitu an ni tih hre reng turin a chah bawk.

Inkhawmpui hi MESA president Lalropuia'n a kaihhruai a, an member thar mi pasarih lawmna leh member thi mi pasarih sûnna hun hman a ni a, pension-a chhuak mi 20 an thlah bawk. MESA-ah hian member 369 an awm mek a ni.