Nov. 2022-ah hripui vei thi an awm lo Covid-19 vei 144 hmuh chhuah a ni

Kumin November thla chhung khan Mizoramah Covid-19 vei mi 144 hmuh chhuah a ni a, hripui vei dam tawh mi 176 chhuahtir an ni. November thla chhungin Covid-19 vanga thi an awm lo a, kum hnih chuang hnua thla khata thi an awm loh vawi khatna a ni.

IDSP, Mizoram chhinchhiah danin, November 2022 chhunga Covid-19 positive hmuh chhuah mi 144 chu chawhrualin ni tin mi pali chuang hret (4.8) an awm ang a ni a, October-ah chuan mi 11 chuang hret awm ang a ni thung.

November thla liam ta chhungin Covid-19 vei zingah thi an awm lo a; kum hnih chuang kal ta, October 28, 2020-a Mizorama Covid-19 vanga thi hmasa ber Sangkhuma a thih hnuah thla khat chhunga hripui vanga thi an awm loh vawi khatna a ni.

Kumin November thlaa positivity rate chawhrual chu 4% a ni a, thla hmasa lam aiin a hniam zawk hle. Positivity rate hi kumin January-ah 19.75%, February-ah 25.16%, March-ah 15.27%, April-ah 12.74%, May-ah 9.06%, June-ah 10.87%, July-ah 24.18%, August-ah 22.82%, September-ah 10.19% leh October-ah 7% a ni.

Hripui vei dam tawh November thlaa chhuahtir zat chu mi 176 an ni a, positive hmuh zat 144 aiin 32-in a tam zawk.

Kumin 2022-ah January aṭanga November thla thlengin swab sample 4,84,566 endik niin, chu'ng zinga mi 97,289 chu Covid-19 positive an ni a; hripui vei dama chhuahtir mi 98,739 an awm laiin, mi 181 an thi tawh thung.