KHAWTHLIR

Chief justice lo zin
Zan hnih riaka Mizoram rawn tlawh tur Gauhati High Court chief justice, Justice RM Chhaya chuan nimin khan Aizawl a rawn thleng a, Mizoram sorkar leh High Court hotute'n Lengpui Airport-ah an lo hmuak. Mizorama a chàm chhungin court lam thil pawimawhte a ti dawn a ni.

AR Integration Tour
Lungleia Assam Rifles-te chuan November 30, Nilaini khan Lungleiah 'National Integration Tour to Hornbill Festival, Nagaland' an buatsaih. Tour-ah hian Sacred Hearts School, Lunglei zirlai naupang 13 an tel a; Silchar, Nagaland bakah, Guwahati leh Shillong an tlawh dawn a ni.

Kuhva lak luh khap
Champhai district magistrate James Lalrinchhana chuan, sorkar laipuia Ministry of Home Affairs thupek bawhzuiin Champhai district chhungah dan loa kuhva lak luh leh phurh khap tlat a nih thu a puang. Thupek zâwm lote chu IPC Section 188 hmanga hrem theih an ni.

5G network sawiho
Working Committee for Roll out of 5G Network chu November 30, Nilaini khan an chairman Dr Renu Sharma, chief secretary kaihhruaiin CS conference room-ah an ṭhukhwm a; telecom organisation-te nen March 2023 hmain Mizoram hmun ṭhenkhata 5G hman dan tur ICT Secretary kaihhruaina hnuaiah sawiho ni se, an ti.

Thupui zirho
Mizoram Pradesh Congress Committee chuan November 10, Nilaini khan Congress Bhavan, Aizawlah ‘Thuneihna sem zâi’ tih thupui zirhona an buatsaih a, MPCC Media department chairman Dr Lallianchhunga’n thupui a sawi.

STAM an lâwm
Science Teachers Association, Mizoram chuan thuchhuah siamin, Mizoram Board of School Education-in pawl 10 zirlaite tana science leh mathematics zirlaibu Mizo ṭawnga buatsaih an tichhuak ta chu lawmawm an tih thu an tarlang.

Din champha lawm
Mizo Upa Pawl, Lunglei Rahsi Veng unit chuan nimin khan an MUP Rúnah an din champha vawi 47-na an lawm a, minister C Lalrinsanga, bialtu MLA-in a hmanpui. MUP, Rahsi Veng Unit hi December 1, 1975-ah din a ni a, member 345 an awm mek a ni.

Arro jubilee lawm
Arro khua chuan nimin khan rambuai vanga Khawzawla khâwm a nih hnua khaw hmun ngaia an lêt leh champha kum 50-na lawmna leh haw rûnpui an buatsaih a, Khawzawl district bawrhsap CC Lalchhuangkima'n a hmanpui.

Thentlang jubilee lawm
Thentlang khua chuan nimin khan an khaw kum 50 tlin an lawm a, bialtu MLA leh Assembly deputy speaker Lalrinawma'n a hmanpui. Thentlang khuaah hian in 164 a awm a, mi 821 an chêng mek a ni.