Kuminah LMC inthlan a awm dawn lo; Inthlang turin hun a awm tawh lo - SEC

State Election Commission (SEC) hotute chuan, kumina Lunglei Municipal Council (LMC) inthlan buatsaih turin hun a awm tawh loh thu an sawi.

Vanglaini palai zawhna chhángin SEC hotute chuan, December 15 vel aṭang chuan Mizo mipuite Krismas boruakah an chêng tawh tih an sawi a, "Chuvangin, kumin chhung chuan inthlan buatsaih ngaihna a awm tawh lo. Inthlanna buatsaih tur chuan Mizoram sorkarin LMC office an hawn phawt a ngai a ni," an ti.

SEC hotute chuan, danin a phût angin LMC inthlan hun atan sorkar an ràwn zel tur thu sawiin, "Sorkar kan ráwn ang a, inthlan hun turah thutlukna siam a ni ang," an ti a; LMC danah chuan, inthlan hun turah SEC-in sorkar a ráwn tur a ni, tih tarlan a nih thu an sawi.

Hetih lai hian, SEC chuan LMC inthlan hun tur chungchangah, a hun tur sawipui turin Mizoram sorkar chu ṭum khat an sáwm tawh a, mahse, sorkar chuan an la inpeih loh thu October 6, 2022 khan SEC a hriattir a ni.

SEC hotute chuan, Mizoram sorkarin an la inpeih loh thu an hriattir hnuah inthlan hun sawipui turin an la sàwm leh loh thu Vanglaini palai zawhna chhángin an lo sawi tawh a, "LMC office tur an la hawng lo a, an hawn hunah kan sáwm leh ang," an ti.

Danah chuan, LMC inthlan hi LMC din a ni tih hriattirna, notification a chhuah aṭanga kum khat chhungin buatsaih tur a ni a; hei vang hian inthlan buatsaihna turin March 2023 thleng hun a awm.

SEC chuan, LMC inthlana hman turin electoral roll a buatsaih zo tawh a, final electoral roll pawh October 14, 2022 khan tlangzarh a ni tawh.

Tarlan tawh ṭhin angin, LMC nodal department, UDPA changtu deputy chief minister Tawnluia chuan, LMC inthlan chu kumin 2022 chhunga buatsaih a nih tur thu a lo sawi tawh. Eptu party-te chuan, Deputy CM sawi ang ngeiin kuminah LMC inthlan buatsaih turin sorkar an phût a ni.