ZMC-a thawk tur thiamna sang bik nei ; Ram mi kan hmu zo lo - Health Minister

Sialsuk High School kum 70 (platinum jubilee) tlin lawmna hun leh Sialsuk khaw chhuak haw runpui buatsaih a ni a, an hun hmanpuitu Health minister Dr R Lalthangliana chuan ZMC-a thawk tur thiamna bik nei professor lak tur Mizoramah an hmuh zawh loh thu a sawi.

Health Minister chuan, ZMC atana pawimawh tur thiamna sang bik nei professor an mamawh avangin a zawnin an zawng tih sawiin, "A ram mi kan inhmu zo lo a, vai pitar leh putar pension tawh Rs 2,50,000 ten kan ruai a, a rilru nat thlak ka ti ṭhin," a ti.

Tunlai khawvelah certificate ṭha tak neih ringawtin hna ṭha a hmuh theih tawh loh tih sawiin Dr R Lalthangliana chuan, "Thiamna tak tak neih a ngai tawh a ni," a ti a, zirtirtu leh zirlaite chu thiamna tak tak nei tura theihtawp chhuah turin a chah.

Dr R Lalthangliana chuan Sialsuk chu Mizorama mi hmingthang tam tak lo chhuahna a nih thu sawiin, "Keini MNF hlapui 'Zoram hi kan ram a ni' tih phuahtu Pu Lalṭanpuia pianna hmun a ni. Pi Romani, Pu Zirsangzela Hnamte, Pu James Dokhuma leh Pu Darrokimate pianna pawh a ni," a ti.

Inkhawmah hian bialtu MLA Prof. F Lalnunmawia chuan platinum jubilee puala souvenir buatsaih a tlangzarh.

Health Minister hian Aibawk PHC tlawh nghalin, an mamawh an neih hrang hrangte a enfiah a; ZMC-a Aca-demic Block building-a department hrang hrangte a tlawh nghal bawk.