L Keivom hnenah Academy Award hlàn

Mizo Academy of Letters (MAL) chuan thu leh hla lama thawh hlâwk chawimawina Academy Award 2022 chu L Keivom (L) hnenah an hlân.

Nimina MAL Academy Award hlanna inkhawm hi MAL president Prof. RL Thanmawia'n a kaihruai a, award dawngtu hnenah MLA Dr ZR Thiamsanga'n lawmpuina thuchei, tangkapui leh Rs 20,000 a hlan a, L Keivom aiawhin a fapa David Lalhmingsang, Philippines-a awmin a dawng. L Keivom hi kum 2021 khan a thi tawh a ni.

L Keivom hian Mizo ṭawngin lehkhabu 13 a ziak a, chung zingah chuan Zoram Khawvel volume 1-8, Bâwktláng Thawnthu leh Pherzawl Titi tihte chu a lâr zual an ni. Hmar ṭawngin lehkhabu pasarih leh article 1,200 chuang a ziak bawk.

MAL hian thu leh hla ziakmi langsar leh hmingṭhate hnenah kum 1979 aṭangin Academy Award an hlàn ṭan a; L Keivom telin mi 14-in hnenah an hlàn tawh. Academy Award dawng tawh zinga pathum Rev. Dr Zairema, KC Lalvunga (Zikpuii Pa) leh L Keivom te chuan an thih hnuah an dawng a ni.