Hman khat daih sarang titawp tura Ṭan la turin Minister hoin intiam

Nimin khan Secretariat tualah Environment, Forest & Climate Changte (EFCC) minister TJ Lalnuntluanga hoin National Pollution Control Day hman a ni a; hman khat daih sarâng (single use plastic) tihrêmna turah ṭan la turin an intiam.

TJ Lalnuntluanga chuan, ram leh khawvel hmasawnnate'n bawlhhlawh (pollution) a thlen avangin inven thiam a ngaih thu a sawi a; boruak leh tui tihbawlhhlawh leh ri bengchheng vênna atana dan siamte ngai pawimawh thar turin mi tin a ngen.

Assam hnuaia awm lai aṭangin Mizorama ramngawte humhalhna turin nasa taka ṭan lak a nih tawh ṭhin thu sawiin Minister chuan, "Hman khat daih plastic-te hi lui dunga nungchate'n an tawrh avangin a tihrêmna kawngah khawvel huapa ṭanho ngai thil a ni," a ti.

EFCC Minister chuan, mihring pung zelah tui thianghlim mamawhna a san zel thu sawiin, "Riverine catchment area-te humhalh nan Japan sorkar nen ṭangkawpin JICA project hnuaiah hmalak a ni," a ti a; leilung tihbawlhhlawh thei thil ṭha lote tihtawp kawngah ṭan la theuh turin kal khawmte a sáwm.

Chief secretary Dr Renu Sharma pawhin thu sawiin, Central Pollution Control Board-in hman khat daih sarâng tihtawpna tura hma la ṭha state a thlanah Mizoram chu 12-na leh hmarchhak state zingah pakhatna a nih thu a sawi a, "Thil chhinchhiahtlak tak a ni. Ram leilung venhimna atan kan ṭan zual zel a pawimawh," a ti.

Mizoram Pollution Control Board member secretary C Lalduhawma chuan, hman khat daih sarâng titawp tura hmalakna leh hmachhawp hrang hrangte a tarlang bawk.

National Pollution Control Day hi kum 1984-a Bhopal-a gas puak vanga chhiatna rapthlak taka thite pualin kum tin hman ṭhin a ni a; kumina Day pual hian sikul leh college hrang hrangah hun hman niin, hman khat daih sarâng tihremna turah ṭan la turin thu an tiam a ni.