Zirna ṭha zawk sorkarin a chhawp - Education Minister

Model Middle School, Darlawn chuan nimin khan an sikul tualah an kum 50-na an lawm a, School Education minister Lalchhandama Ralte-in a hmanpui. Minister chuan, zirna ṭha zawk sorkarin a chhawp chhuak mek niin a sawi.

Lalchhandama Ralte chuan, zirnain hma a sawn loh chuan hmasawnna hrang hrangin awmzia tak tak a neih loh thu a sawi a, "Mizoram sorkarin zirna a ngai pawimawh a, zirna lama thawk tur mi 2,800 chuang lak a ni tawh a, heng zingah hian a ngheta lak 100 bawr an awm. Tun hmain zirna sikul hrang hrangah zirtirtu pahnih khat lek awmna a tam hle a, tunah erawh chuan sikul tam takah zirtirtu dah belh a ni," a ti.

Darlawn Model M/S hi kum 1972-ah din a ni a, kum 1974-ah grant-in-aid ah dah a ni. Kum 1980-ah deficit-ah dah a ni a, kum 1991-ah provincialise leh a ni.