Damdawi zawrh phalna license nei lo aṭanga damdawi lei a him lo - MCDA
Mizoram Chemists & Druggists Association (MCDA) hruaitute chuan nimin khan Aizawl Press Club-ah thuthar thehdarhtute an kâwm a; damdawi zawrh phalna license nei lote aṭanga damdawi lei a him loh thu an sawi.
MCDA president R Thanglura chuan, Mizoramah damdawi zawrh phalna license nei mi 4,000 vel an awm thu a sawi a, "Damdawi zawrh phalna license nei loa damdawi zuara kal kual ṭhin an awm a, an zawrh tlàwm zawk avanga lei mai ṭhin mi tam tak an awm. Heng damdawite hi phalna nei loa zuar an nih avangin hriselna atan a him lo thei a, mipui an fimkhur a ngai hle," a ti.
Damdawi zawrh chu sumdawnna leh eizawnna a nih piah lamah, rawngbawlna a nih thu sawiin R Thanglura chuan, "Mihring damna leh thihna thlen thei a nih avangin sumdawnna dang nen a inang lo hle. Damdawi zuar ṭhenkhatin an drug license hmang sualin, thil dik lo leh mihring tana hlauhawm leh nunna hial chàn theihna tur a ni tih hre reng chungin, sum leh pai hlâwkna atan remchangah laa ruihhlo zawrh nana hmang ṭhin an awm a, pawi kan tiin kan dem tak zet," a ti a; chutiang ti ṭhinte chu MCDA-ah an tel a rem loh thu a sawi.
MCDA hruaitute chuan, ruihhlo mai ni lo, damdawi ṭhat tâwk loh vangin mihring taksa leh nunnain a tuar thei tih an sawi a; damdawi lei dawnin a ṭhat leh ṭhat loh te, a thi tawh em tih leh company ṭha a nih leh nih lohte chian hmasa turin mipui an ngen a, "Effect pawh nei lo, side effect pawh nei lo damdawi hian awmzia a awm lo a ni tih hriat a ṭha," an ti.
MCDA TARLAN ṬHENKHAT
* Mizoramah drug license nei mi 4,000 vel an awm a, mi 50,000- 60,000 velin eizawn nan an hmang mek.
* Damdawi lem leh tak hriat nan damdawi káwr/báwma QR code scan in, a siamtu company hming en ṭhin tur, damdawi lem QR code-ah chuan company hming a lang thei lo.
* Online-a damdawi chah a him tâwk lohna tam tak a awm a, doctor lehkha lem hmanga chah theihna a tam.
* Drug license nei zingah mi dang hawhtir an awm ṭhin a, chutiang mite zawn chhuah kawngah sorkarin nasa lehzualin hma la se.
* Drug license nei loa damdawi zawrh hi dan phal loh a nih bakah, an damdawi zawrh lei a him lo.
* Damdawi fak mawi leh tláwm nazawng lei a him lo a, sawisel leh a dik lo palh a awma pan theih tur damdawi zawrhna pangngaiah lei ṭhin tur a ni.