Ruihhlo hman khaw loh laka Inven dan tur inzirtir a ni

Champhaia Excise & Narcotics department leh Khawbung Branch YMA chuan nimin khan Khawbung Community Hall-ah ruihhlo hman khaw loh laka inven dan inzirtirna, Anti-Drugs Awareness Campaign an buatsaih a, thupuiah 'Say No to Drugs and Yes to Life' tih hman a ni.

Awareness campaign hi Krismas leh kumthar lo thleng tur denchhena ruihhlo do beihpui thlakna special drive kalpui mek puala buatsaih a ni a; mi 230 vel an tel.

Champhai END asst. commissioner Vanlalvura Ralte chuan, ruihhloin ṭhalaite a rûn nasat thu a sawi a, "Tunah hian ruihhlo lut leh tawlh dan (supply reduction) kan beih mek hi a tawk zo tawh lo a, tleirawlte leh a la tichhin ve ngai lote hnena ruihhlo ti ve lo tura zirtir leh hrilhhriat (demand reduction) lamah ṭan kan lak nasat a ngai tawh hle a ni," a ti a, ruihhlo laka inthiar fihlim tur leh midangte zirtirtu nih tum ṭheuh turin kalkhawmte a chah.

Tarlan danin, Anti-Drugs Awareness Campaign Special Drive kaltlang hian Champhai district hmun thlan bikah zirtirna neih chho zel a ni a, Champhai Vengthlang, Hnahlan leh Khawbungahte hun hman tawh niin, December 4, 2022 hian Sesih Community Hall-ah neih leh tura ruahman a ni.