National Pollution Control Day hmang

Nimin December 2 kha National Pollution Control Day a ni a, he ni pual hian Mizo High School tualah hun hman niin, School Education secretary Lalzirmawia Chhangte-in a hmanpui. Thupui chu 'Single Use Plastic Free Day' tih a ni.

National Pollution Control Day hmanna inkhawm hi Mizo HSS principal C Lalthanpuii'n a kaihruai a; zirlaite chu hman khat daih sarâng (single use plastic) hmang lo turin an intiam a, thutiam an sawi rual a ni.

Khuallian Lalzirmawia Chhangte chuan, Mizoram chhe zel tur leh a chhe tawh sa chhanchhuaka siamṭhatu ni turin zirlaite a sáwm a, "Kan ram neih chhun venhim kawngah mawhphurhna nasa tak kan kutah a awm a ni," a ti.

India sorkarin July 1, 2022 aṭangin hman khat daih sarâng hman a khap tih sawiin Lalzirmawia chuan, "A ṭha zawnga khawvel siamṭha duh kan nih theih nan mi dangte tihhmuhtu, kawhhmuhtu, hma latu kan nih a ngai a, mite tana thu thehdarhtu kan nih theih nan nasa taka ke kan pên a ngai a, mawhphurhna nasa tak kan kutah a awm tih kan hriat a ṭha," a ti a; hman khat daih sarâng hman a nih loh nan theihtawp chhuah turin zirlaite a chah.

Inkhawm hi School Education deputy secretary Pinky Zosangpuii, Samagra Shiksha state project director Lalhmachhuana leh officer dangte'n an hmanpui bawk a; Mizoram Pollution Control Board scientist Alfred Malsawmsanga'n sarâng/plastic-in ram a tihchhiat dan a sawifiah a ni.