PC party-in zu zawrh ṭha an ti

Peoples' Conference party president Vanlalruata chuan, Mizoramah khuahkhirhna hnuaiah zu zawrh ṭha an tih thu nimin khan an party pisaah a puang.

Vanlalruata chuan, zu chu fak leh sawi mawi chi a ni lo tih sawiin, "Khuahkhirh ngai a ni a, zu chhia phei chu hlauhawm tak a ni a, tih bo ngai a ni," a ti a; Mizoramah zu chhia a tam tih sawiin, "Ṭhalai leh la valai tak tak mu hlum tam tak hi zu chhia an in thu sawi tel a nih deuh zel avangin zu chhia in vanga thi an tam hle niin a lang. Zu chhia tibo tur hian khuahkhirhna felfai leh endikna rintlak nen zu ṭha siam a ngai a ni," a ti.

Mizoram chu India ramah chhiah hmu tlem ber state a nih thu sawiin Vanlalruata chuan, "Zu chhiah pawh kan hmu tlem hle a, chutih laiin, zu khap bur anga kan insawi lai hian tun hnai kum 30 chhung hian kum tin zu chhiah kan hmu ziah," a ti a, Mizoramin zu chhiah a hmuh dan leh hmuh a tum dan a tarlang.

PC President chuan, India sorkar aṭanga Mizoramin pawisa a dawnah kum tin zu chhiah a tel tih sawiin, ''Kan dinhmun dik tak enin, kan ramah hian dan hnuaiah zu ṭha siam leh zawrh a ṭul PC party chuan kan ti tak zet a ni," a ti.

PC party President tarlan danin, Congress sorkar laia Mizoram sorkarin zu aṭanga chhiah a hmuh dan chu - kum 2013-14 ah cheng vbc. 250 (revised estimate), kum 2014-15 ah vbc. 270 (actual), kum 2015-16 ah vbc. 39.42 (RE), kum 2016-17 ah vbc. 70.68 (actual), kum 2017-18 ah vbc. 64.96 (actual), kum 2018-19 ah vbc. 63.91 (actual) a ni. MNF sorkar hnuah kum 2019-20 chhungin vbc. 2.55 (actual) leh kum 2020-21 chhungin nuai 85 (actual) hmuh a ni a; kum 2021-22 chhungin nuai 70 (RE) leh kum 2022-23 chhungin nuai 79 (RE) hmuh beisei a ni bawk.