Kan ram politics-a Pathian ram thlentir kan ngai pawimawh - Lalduhoma

ZPM leader Lalduhoma chuan nimin khan Tuikum bial chhunga khaw hrang hrangte fangin, vantlang inkhawmah an party chuan Mizoram politics-a Pathian ram thlentir an ngaih pawimawh thu a sawi.

Ram rorelnaah Pathian ram a thlen loh chuan an policy zawng zawngin awmzia a nei dawn lo tih sawiin ZPM Leader chuan, "Bible-ah Genesis leh Thupuan inkarah hian Vanram chungchang leh Thlarau lam chungchang a sawina hi tlemte a lang a, a bak zawng chu he khawvela Pathian ram kan din dan tur a ni," a ti.

Lalduhoma chuan, Bible hi Pathian manifesto an tih thu sawiin, "Chu Pathian manifesto-in a tum ber chu lalram pahnih din a ni a; pakhat chu chatuan lalram a ni a, pakhat chu leia a lalram a ni," a ti a, he leiah hian Pathian lalram din phawt a, chuta a khua leh tui nih phawt loh chuan chatuan ramah tumah an luh dawn chuan loh thu a sawi.

ZPM Leader chuan he leia Pathian ram din theihna tura pawimawh ber chu sorkar ṭha neih a nih thu sawiin, "Thawhṭanni leh Inrinni inkarah hian kan ram politics-ah hian Pathian ram thlentir hi ZPM chuan kan ngaihpawimawh ber a ni a, chu chu kan ram siamṭhatna tur a ni. Kan Pathian hian inthawina aiin dik taka rorel hi a lawm zawk," a ti.