MNF-in kan ti ang an tih an tihlawhtling ngai miah lo - Congress Vice President

Mizoram Pradesh Congress Committee (MPCC) vice president Lal Thanzara chuan, Congress party-in an tih tur an sawite chu an tihlawhtling zel a, MNF party erawh chuan tih tur an sawite an tihlawhtling ngai lo niin a sawi.

Lal Thanzara hian nimin khan Congress Bhavan-a inkhawmah thu sawiin, MNF leh Congress sorkar a khaikhin a, "Congress party-in kan tih chu kan tihlawhtling zel a, MNF-in kan ti ang an tih chu an tihlawhtling ve ngai miah lo," a ti.

MPCC Vice President chuan MNF chungchang sawiin, "Kawng chhâwng kan siam ang an ti a, a bul pawh an la ṭan lo . Aizawl khawpui hi traffic jam awm lohna khawpuiah kan siam ang, an ti a, PAHOSS an sem chiam a, mahse, vawiin thlengin traffic jam a la reh phah lo," a ti a; Assam Rifles chhuah hun tur an sawi pawh a dik thei lo tih a sawi.

Lal Thanzara chuan, Covid-19 lên ṭan tirh lama India ram hmun hrang hrang awm Mizo awmte a huhoa an rawn haw theih chhan chu Congress sorkarin rêl kawng lian chi a siam vang leh Lengpui Airport a siam vang a nih thu te, Covid-19 vei tam tak enkawlna Referral Hospital chu Congress zara Mizoramin a neih a nih thute a sawi.

MNF hotute'n Seṭhâwnah ruihhlo ngaite enkawlna lian ber siam dawn anga an insawi laiin, ruihhlo donaah hmalakna an nei mumal lo nia sawiin Thanzara chuan, "Mizoram chu drug hmunpuiah a chang chho mek," a ti a; kuhva ro dan loa lak luh chungchangah, "Kuhva ro supply an titawp thei miah lo hi an hotu lawkte'n chanvo an neih ve tlat vang a nih ka ring tlat," a ti.

Lal Thanzara chuan, Congress party president Lalsawta chu mi hmingṭha a nih thu te, MNF president Zoramthanga chu mipuiin an duh lo ni mai loin, an nuih a zat tlat zel thu te, ZPM leader Lalduhoma chu mipuiin an rin zawh tak tak loh thute a sawi bawk.