ZPM Ṭhalaiin mipui bumah MNF sorkar an puh

ZPM Ṭhalai chuan, kum 2018 inthlanpui dáwna MNF au hla, traffic jam awm lohna khawpui leh kawng chhâwng siam tihte chu tun thlengin Aizawl khawpuiah a hmélhmang hmuh tur a la awm lo chu mipui bumna lian taka an ngaih thu an tarlang.

ZPM ṭhalaite chuan, RTI Act hmanga an chhuina aṭangin Bawngkawn leh Vaivakawna kawng chhâwng siamna atan DPR siam a la ni lo tih an tarlang a, "Feasibility report siamna atan cheng nuai 82 sên a ni tawh tih hriat a ni a, feasibility report siam turin Telecommunication Consultant India Ltd. rawih an ni," an ti.

ZPM Ṭhalaiin RTI Act hmanga an zawhna sorkarin a chhan dan an tarlan danin, bawngkawn leh Vaivakawnah kawng chhâwng siam ṭan hun tur hriat a la ni lo a; hna thawh ṭan hun tur hriat theih a ni lo bawk.

Traffic jam awm lohna khawpuia Aizawl siam leh kawng chhâwng siamte chu kum 2018 inthlanpui neih dawna MNF auhla a nih thu sawiin ZPM Ṭhalai chuan, "Vawiin thlenga Aizawl khawpuia hmuh tur a la awm lo hi mipui bumna lian takah kan ngai a, vawiin thlenga sorkar berin kawng chhâwng siam hun tur a la hre lo hi a beidawnthlâk hlein kan hria," an ti a ni.