KHAWTHLIR

Lusûn khawhar
Doordarshan Kendra, Aizawl Regional News Unit-a stringer Alfred Vanchhawng (50) h/o Mary Lalthanpuii chu nimin chhun dar 12:15 khan thin cancer avangin Civil Hospital, Aizawlah a thi a, vawiin chhun dar 12-ah Tuikuala an inah vui a ni ang. Alfred Vanchhawng hi kum 2004 aṭangin DDK-ah a thawk a, kum 2009-ah MJA member a ni ṭan a, kum 2014 aṭanga a hun tàwp thlengin MJA Executive Committee member a ni.

Rualbanlote Ni
Khawzawl district-a Samagra Shiksha chuan nimin khan District Education pisa kawtah Rualbanlote Ni (International Day of Persons with Disabilities) pualin hun an hmang a, zirlai mamawh bik nei mi 55 hnenah thilpek hlan a ni. Rualbanlote Ni hi November 3 a ni a, Inrinni a nih avangin nimin khan hman a ni.

Khuahkhirhna hlîp
Champhai district-ah ran natna, Foot & Mouth Disease nia rin hmuh a nih avanga bâwng lak luh leh phurh chhuah khuahkhirhna thupek chhuah tawh chu nimin khan Champhai district magistrate James Lalrinchhana'n a sût. Champhai district aṭanga bâwng phur chhuak turte chu AH&Vety department aṭanga veterinary soundness certificate nei tura hriattir an ni.

Mualkhang jubilee
Mualkhang khua chuan nimin khan an khaw kum 50-na, golden jubilee an lawm a, bialtu MLA K Laldawngliana'n a hmanpui. Mualkhang khua hi kum 1972-ah din a ni a, golden jubilee lawmpui nan MLA K Laldawngliana'n YMA hnenah combo speaker a pe a ni.

Library hawng
Republic Vengthlang Branch YMA Library in sak thar chu nimin khan bialtu MLA C Lalsawivunga'n a hawng. Library hi MLA fund Rs 4,90,000 hmanga sak a ni.