President-in Assembly House-ah thu a sawi ; Mizoram Assembly hi entawn tlak a ni - President

President Ram Nath Kovind hoin nimin khan Mizoram Assembly special session neih a ni. President chuan, Mizoram Assembly inrêlbâwl dan leh House chhunga member-te chêt dan chu India ram chhung hmun dangte tan entawn tlak a nih thu a sawi a; Mizoramah la zin leh ngei a tum thu a sawi bawk.

President chuan, Mizorama a zin vawi khatnaah Assembly House-a thu sawina remchang pek a nih avangin Speaker, Deputy Speaker, Chief Minister leh MLA dangte chungah lawmthu a sawi a, "Mizoram hi India ram tan a danglam bik a, ram chhung hmun dangah chuan Assembly House chhunga rorelna kal thei loa inhnialna leh boruak duhawm lo tak tak a thleng ṭhin laiin, Mizoramah chuan chutiang chu kum 45 chhungin vawi khatmah a la thleng lo a, hmun dangte tan entawntlak a tling," a ti.

Mizoram chu khawtlang nunah a hausa hlea a hriat thu sawiin, political pary te, kohhrante leh tlawmngai pawl ṭha tak a awm a, chu'ngte chuan Mizoramah remna leh muanna a awm theih nan leh ram hmasawnna atan an thawh hlâwk hle tih a sawi a, "Mizoram peace accord hi India rama peace accord hlawhtling ber pakhat a ni," a ti a, Laldenga (L), Lal Thanhawla leh Brig. T Sailo ten Mizoram tan an thawh hlâwk thu leh anni pathum chu Mizoram din chhuaktu an nih thu a sawi.

India ramah hnam, chi, sakhua, ṭawng, hnam nunphung, chîn dan leh hnam incheina chi hrang hrang a awm thu sawiin President chuan, "Hengte hi India ram chakna a ni. Hnam hrang hrangte lungrual taka kan chengho hian India ram ropuizia a tilang a, hengte hi kan vawnhim tlat a pawimawh," a ti.

Ram Nath Kovind chuan, India rama hnam hrang hrangte ram chhung hmun danga zirna leh hna vanga an awm ṭhin chu India rama hnam hrang hrangte inhriat chian nan a ṭhat thu sawiin, "Mizo ṭhalaite Kerala emaw, Pune emawa hna an thawk hmuh hian an eizawnna a nih piah lamah, hnam nunphungte min hmuhtir a ni," a ti a; India ram danglam bikzia lantirtu an nih thu a sawi.

Mizoram chu sorkar laipui policy, Act East Policy-in a kawh ber a nih thu sawiin President chuan, "He Policy hian a tum chu, Mizoram leh hmarchhak state dangte bakah, Asia chhimchhak lam ram ṭhenawmte nena inkalpawhna ṭha neih a ni," a ti. Mizote chu Asia chhimchhak lam ram mite nen hmêl leh nunphungah inanna tam tak an nei tih sawiin, "Mizoram hi Asia chhimchhak ramte nena insumdawn tawnnaah hmun pawimawh ber a la ni dawn a, chuta tan chuan India sorkarin hma a la mek a ni," a ti.

President of India chuan, MLA-te chu an bial chhunga anmahni thlang tlingtute vanga MLA ni thei ni mah se, MLA an nih tawh chuan anmahni thlangtute chauh ni loin, bial chhunga mi zawng zawngte aiawh, an tana thawk tur an nih thu a sawi a, "Legislator chuan amah vote-tute leh vote lotute ang khatin a en tur a ni," a ti a; inthlan laia an khingpuite chu an hmelmate an nih loh thu a sawi.

Ram Nath Kovind chuan, Mizoram chu nuam a tih thu sawiin, ni hnih chauh a chàm chhungin Mizo mipuite chet dan leh amah an lo lawm danin a thinlung a khawih thu a sawi a, "Kawng laka min lo lawm dante a ropui a, ka hre reng tawh ang. Mizoramah hian ka lo let leh ngei ang tih ka tiam a ni," a ti. President hian Mizoram chu hmasawn zel tura duhsakna a hlan rualin, Mizo mipuite chu hlim Krismas leh kum thar hmang turin duhsakna a hlan a ni.

Governor Lt.Gen. Nirbhay Sharma pawhin thu sawiin, President Ram Nath Kovind-a'n Mizoram a rawn tlawh hmasakna bera Mizoram Legislative Assembly member-te nen hun ṭha tak an hmang thei chu a lawmawm a tih thu a sawi a; Mizoram Peace Accord chungchang sawiin, "Peace Accord hlawhtlinna ber chu Mizo mipuite an ni a, Mizo mipui leh khawtlang inpawh tak, lung­rual leh thawhhona ṭha tak hi ram chhung hmun dangte tan entawntlak a ni," a ti.

Larsap chuan, Act East Policy kalpuinaah Mizoramin dinhmun pawimawh tak a luah tih sawiin, "Infrastructure lamah a la pachhiat avangin inkalpawhna leh inbiakpawhna ṭha leh ram chhung leh pawn nena inzawmna ṭha a neih theih nan ruahmanna changtlung tak siamsak a ngai a ni," a ti. Tun hnaia Mizoram leh Myanmar ramri vela boruak thleng vang pawhin ramri venhimna hna uluk zawka kalpui a pawimawh thu a sawi bawk.
Assembly session hi speaker Hipheia'n kaihruaiin, President lawmna thu a sawi a; House leader Lal Thanhawla, chief minister-in lawmthu sawina hun a hmang.

CM Lal Thanhawla chuan, Mizoram Assembly House chu India rama inthununna leh inkaihhruaina ṭhat berna House a nih thu a sawi a; Mizoram chu India rama state ṭhang chak ber pali zinga a tel thu te, Mizoramin hydel project lamah remchang a nei ṭha a, kawlphetha megawatt 9,090 siam chhuah theihna a neih thute hriatpui turin President a ngen.

Assembly special session zawhah President hi Governor leh MLA-te nen Assembly Annexe Recess Room-ah an inkawmho leh a; chumi hnua Raj Bhavan-a chawchhun a ei hnuah, nimin chawhnu khan Mizoram a chhuahsan a ni.