President-in zirlai naupangte a kâwm

Zan khat riaka Mizoram rawn tlawh, President Ram Nath Kovind chuan nimin zing khan Raj Bhavan tualah zirlai naupangte a kâwm. President hi Governor Lt.Gen. Nirbhay Sharma leh School Education minister H Rohluna ten an ṭawiawm a ni.

President chuan, zirlaite chu an nu leh pate tan mai bakah, khawtlang leh ram nghahfâk an nih thu sawiin, "Mizoram hi lehkhathiam tamna state a ni a, hei hian hmasawnna duhawm a thlen chhoh ka beisei. Chumi atan chuan ṭhangtharte'n mawhphurhna pawimawh tak an nei a ni," a ti.

Mizo society leh hmun dangah pawh zirna kawngah hmeichhiate'n a ber nihna an hauh ta zel chu lawmawm a tih thu sawiin Ram Nath Kovind chuan, "Hmeichhiate'n hma an sawn chuan ramin hma an sawn tihna a ni," a ti a; zirlaite chu an hlawhtlinna atana an zirtirtute pawimawhzia hre reng turin a chah.

President leh zirlaite inkawmnaah hian Mizo High School, Mizo Higher Secondary School, Synod Higher Secondary School, Mamawii Higher Secondary School, PC Girls' School, JL Higher Secondary School leh MICE aṭang­in zirlai 100 vel an tel a ni.

Zirlai naupangte nen an inkawm zawhah President hian khawtlanga mi langsar te, tlawmngai pawl ṭhenkhat aiawhte leh tun hnaia infiamna lama Mizoram tihmingṭhatute a kâwm leh a ni.