ZPM-in Lungleiah pisa an hawng

Ṭangrual pawl, Zoram Peoples' Movement (ZPM) chuan nimin khan Lungleia an pisa thar an hawng a, ZPM gen.hqrs. hruaitu Lalliansawta'n a hawng. ZPM Lunglei Steering Committee vice chairman Upa PC Hranghnuna'n kaihhruaiin, ZPM general secretary K Sapdanga leh Lunglei ZPM general secretary V Kapchungnunga ten report an pe a; Lalduhoma, PL Liandinga leh Vanlalhlana ten thu an sawi.

Lalliansawta chuan, ZPM chu Zoram mipui mangangin an au chhuah a nih thu leh ṭangrual pawl chuan kalphung thar hmangin mipui sorkar din an tum thu a sawi a, "Dik taka ro a rel theihna turin Val Upa Council kan nei a, kan ring ngam a, kan thla a muang a ni," a ti.

MPC sr. vice president Vanlalhlana chuan, Mizoramin buh thar tura leilet a neih zau zawng ngaihtuaha a la intodelh lohzia leh kawlphetha lama a la intodelh lohzia sawiin, "Heng zawng zawng hi MNF leh Congress sorkarin hmalakna an neih loh vang a ni," a ti a; Congress leh MNF party-te chu chhun pachangah rûi lo hai loin an zankal niin a sawi.

ZNP president Lal­duhoma chuan, ZPM chuan kut hnathawktute an ngai pawimawh dawn tih sawiin, "Kan ramah hian leileta siam theih zinga 23% chauh leilet atan siam a la ni a, keini chuan leileta siam theih zawng zawngte kan siam ang a, kut hnathawktute thar chhuah leina tur sum budget-ah kan dah dawn. Lo neitute buh thar zawng zawng kan leisak ang a, chu chu ration atan kan sem dawn a ni" a ti.

PL Liandinga chuan, Mizoram kalphung enin, mipuiin an chanvo tur an chan lohte zawng zawng ngaihtuahin, ngawih reng theihna chi a ni tawh lo tih sawiin, "Ka ngawi reng thei ta bik lo a ni. Ngawih reng hi finna a ni lo a, finga inngaihna mai a ni. Kan ram hi kan hetih zawk takna chhan chu mi fing, fel, thiam leh dik zawkte inrawlh duh loa an ngawih tlat vang a ni," a ti a; a hniak tam zawkin dik lo leh ṭha lo zawk thlang mah se, chu kawng chu a zawh ve theih loh thu a sawi.