MZP-in India President hnenah Chakma chungchang an thlen

MZP chuan Mizoram tlawha rawn zin, President Ram Nath Kovind hnenah nimin khan memorandum an thehlut. Mamorandum-ah hian Bangladesh aṭanga Chakma dan loa Mizorama lo lut chungchang an tarlang.

MZP chuan, Bangladesh aṭanga dan loa Mizorama Chakma pêm lutte chu Mizoram harsatna ber pakhat a nih thu tarlangin, chu harsatna chinfel kawnga hma lâkpui turin an ngen a, "Nangmah leh in party chu Bangladesh aṭanga dan loa rawn pem lutte dan leh hnawh chhuah kawngah hma la turin kan nge a ni," an ti.

MZP hian an lehkhaah hian, hmanlai aṭang tawhin Mizoram chu Chakma-te chenna ram a nih ngai loh thu te, Mizoramah ram leilung fa an nih loh dan te, Mizoramah Chakma-te an pung chak hle a, kum 1901-ah mi 198 chiah an awm laiin, kum 1991 chhiarpuiah chuan mi 80,000 vel an awm tawh thu te, Chakma pun dan chu inthlah punna aṭang ringawt ni loin, dan loa Bangladesh aṭanga pem lut an tam vang a nih thute an ziak a ni.

Kum 2014-a Lok Sabha inthlan dawnah BJP prime ministerial candidate Narendra Modi-a'n Assam a tlawh ṭumin, dan loa India rama pem lutte hnawhchhuah kawngah hma a lak tur thu a sawi tih tarlangin MZP chuan, "Prime Minister hian a thu sawi hi a tihpuitlin ngei kan beisei a, nang pawhin hma min laksak turin kan ngen che a ni," an ti.