Garage neihna atana hun pek a tawp

Mizoram sorkarin lirthei nei zawng zawngte'n a dahna (garage) an neihna tura hun a pek chu nimin, November 30 khan a tawp a, vawiin aṭangin thuneitute'n garage nei leh nei lo an endik ṭan dawn.

Coordination Committee on Traffic Management chuan, Aizawl khawpui chhunga lirthei neite'n a dahna tur garage kum khat leh thla hnih chhungin an nei vek tur a ni tiin thuthlukna an siam a; October 1, 2016 aṭanga November 30, 2017 thleng hun an pe a ni.

Working Group Committee on Traffic Coordination Committee member-te, nimina an chairman Lalbiakzama, Home additional secretary hoa Traffic SP pisaa ṭhukhawm chuan, garage neih hun atana hun bituk a tawp tâk avang­in garage nei leh lo endik tura thawh chhuah an rel a ni.

Ruahmanna an siam dan chuan, zanin dar 8 hian Aizawl SP pisa tualah Working Group Committee member, Traffic Police leh Transport Enforcement Team-te an kal khawm ang a, garage nei lo enfiah turin an in chhuak dawn a ni.