PHE Minister-in Biate tui lakna a tlawh
PHE minister Zodintluanga leh minister Vanlalawmpuii Chawngthu te chuan nimin khan Biate khua châwmtu tur, Biate Water Supply Scheme (Pumping) hna thawh mek a hmunah a tlawh a; East Lungdar leh a chhehvel khua châwmtu tur water supply scheme atan sum hmuh thuai beisei a nih thu a sawi.
Zodintluanga chuan, “Biate leh East Lungdar khuate tui chungchanga harsatna an tawh kan hria a, tunah chuan he harsatna hi sutkian mek a ni," a ti a; bialtu MLA, minister Vanlalawmpuii Chawngthu-in theihtawp chhuaha a nawra hma a lakna azarah Hrangturzo bialin hma a sawn thu a sawi.
Cheng nuai 1364 sênga Biate tui lak hna thawh mek chu 23.74% thawh zawh a nih tawh thu sawiin PHE Minister chuan, "Contractor hian theihtawp chhuahin hna a thawk a, main reservior tui litre 1,70,000 dawng chu siam zawh deuhthaw a ni tawh," a ti.
East Lungdar Multi Village Water Supply Scheme (Leng rih pumping) chungchang sawiin Zodintluanga chuan, “Project hi cheng nuai 1200 senna tur a ni a, NEC 2017-18 ah dah tawh niin, September 2017 khan EE leh SDO ten NEC-ah Technical Clearance an tifel tawh. January 2018-ah an rawn endik ang a, chumi hnuah sanction a ni tawh ang," a ti a; he scheme hian kum 2039 thleng East Lungdar, Leng leh Sailulak mipui 6,131 a chawm zo hle dawn niin a sawi.
PHED Minister hian PHE department hmalaknaa Rs. 8,00,000 sênga siam, East Lungdar Solid Waste Dumping Ground (bawlhhlawh paihna) a hawng bawk.