IMA-in inkhawmpui an hmang

Indian Medical Association (IMA), Mizoram State Branch chuan nimin khan Aijal Club-ah inkhawmpui an hmang a, Health minister Lal Thanzara'n a hawng.

Health Minister chuan, medical lama hmasawnna turin ṭanrual a ṭul thu sawiin, "Hmasawnna atan professional body hrang hrang, mithiam, khawl ṭha leh changkang zawk te, zirna hmun ṭha leh research lama hmalakte a pawimawh. IMA-in thiamna leh hriatna tihmasawn tura meeting leh CME an buatsaih ṭhin te, mipui zirtirna leh hriatna dik pe tura TV leh media-a programme an buatsaih ṭhinte hi a lawmawm hle a ni," a ti.

IMA Conference hawnna inkhawm hi IMA, Mizoram president Dr Vanlalruata’n a kaihruai a; honorary secretary Dr John Zohmingthanga’n kum khat chhunga an pawl hmalakna hrang hrang a tarlang.

IMA hi India ram pum huapa doctor-te insuihkhawmna pawl a ni a, medical science-in hma a sawn zelna turin hna an thawk a, mipui zirtir leh enkawl kawnga hma latu pawl a ni. IMA, Mizoram Branch hi kum 1972-ah din a ni a, member 668 an awm mek a ni.