KHAWTHLIR

Halpuah khap
Lawngtlai DC Dr Arun T chuan thupek chhuahin, Lawngtlai district chhungah kumin Krismas leh kum thar vuakvetah hâlpuah, hâlmawi, silai lem a mu kap chhuak thei leh puak thei thil dang, boruak ti ṭha lo leh bengchheng siam thei zawrh, hralh, kawl, hâl leh hman a khap. Thupek hian thla hnih chhung a huam ang.

Thisen pe
Chawlhhmun Branch KṬP leh Chawlhhmun North Branch KṬP-te chuan nimin khan Chawlhhmun Kohran Hall-ah blood donation camp an huaihawt a, Synod Hospital tan mipa 20 leh hmeichhia pakhatte'n thisen unit 21 an pe.

Hriattir tur
Mizoram sorkar chuan thuchhuah siamin, two wheeler taxi hmangtute chu State Transport Authority (STA) bituk rate aia tam two wheeler taxi chuan man late chu an taxi hman registration number, taxi hman hun leh hlat zawng tarlangin, STA Secretary emaw, phone no. 239609, 9612735314 leh 9436143691-ah emaw hriattir turin an ngen.

Quiz zo fel
Serchhip SSA-in Rashtriya Avishkar Abhiyan Quiz Competition on Science & Maths an buatsaih chu nimin khan Serchhip P&E Veng YMA Hall-ah zawh a ni a, DC Sangchhin Chinzah-in a hmanpui. Quiz-ah hian Presbyterian English School, Serchhip pakhatna an ni a, Chhuanthar Middle School, Baktawng leh Presbyterian English School, North Vanlaiphai te chu pahnihna niin, Chawngbuangi Memorial School, Serchhip pathumna an ni.

NLUP sem
AH& Vety department chuan Nilaini khan NLUP hnuaia bawng, ar leh sial vulh thlangtu mi 160 hnenah Siahaa AH& Vety pisaah ṭanpuina an sem. Ṭanpuina hi ar vulh thlangtute hnenah Rs. 47,260 ṭheuh, vawk vulh thlangtute hnenah Rs. 64,000 ṭheuh leh sial vulh thlangtute hnenah Rs. 47,000 ṭheuh sem a ni.