MPSC-in hna lâk an ṭan leh dawn MSSSB-in hna an thawk ṭan tawh

Vanglaini palai zawhna chhangin MPSC chairman Lalramthanga Tochhawng chuan, Covid-19 vanga inkhàrkhip chhungin hna lak an chawlhsan thu a sawi a, "Unlock kalpui a nih hnuah hna lâk chhunzawm turin ruahmanna kan siam. Tunlai hian Covid-19 vanga fimkhurna tur leh zawm tura duante bawhchhe si loa hna lâk ṭan leh turin kan inbuatsaih mek," a ti.

Lalramthanga Tochhawng chuan, MPSC-in hna lâk a buaipui turte chu Covid-19 lèn hmaa mi vek a nih thu sawiin, "Covid-19 avangin exam tawh interview tur leh exam tura tihfel vek tawh admit card pek chhuah tawh eng emaw zat chu cancel (sût) a ni. Chu'ngte chu lâk chhunzawm leh a ni dawn," a ti a, hri laka fimkhur tak siin exam buatsaih a nih tur thu a sawi.

Diltu tam deuhnate chu tun dinhmunah chuan a buaithlak rih thu sawiin Lalramthanga chuan, "Sorkarin dan leh hrai zawm dawn chuan kan exam hall, mi 700 lennaah hian mi 200-300 vel chauh an leng thei dawn. Chuvangin, diltu tamna deuh chu exam buatsaih a buaithlak a, diltu tlem deuhnate tih hmasak phawt a ni ang," a ti.

MPSC Chairman sawi danin, Covid-19 vanga sorkarin inrenchemna tur hrang hrang a puan hnuah chuan Covid-19 lèn hmaa an lo ruahman lâwk tawhte bâk chu hna nghet lâk thar tur an nei rih lo. Vanglaini palai zawhna chhangin MSSSB chairman K Lalrammawia chuan, hna thar lak tur an neih loh thu a sawi a, "Mahse, sorkarin a phal angin departmental exam chu ṭum khat kan buatsaih ve tawh a, la buatsaih tur pahnih kan nei. Sorkarin a remtih angin promotion leh sorkar hnathawk nghet lote dah ngheh hna pawh kan buaipui," a ti.

Mizoram sorkarin group B (non-gazetted) chin hnuai lam la tura a din MSSSB hian tun hnai khan departmental exam a buatsaih a, nimin khan result a tichhuak. Hei hi din a nih hnua exam a buatsaih hmasak ber a ni.