College admission chungchang Chief Minister hoin ngaihtuah

Chief minister Zoramthanga hoin nimin khan Chief Minister's Office-ah Mizorama college admission chungchanga harsatna awm theite sutkian dan tur sawiho a ni a; Higher & Technical Education (HTE) minister Dr R Lalthangliana, HTE Secretary, Finance Secretary, HTE officer-te leh IASE Principal-te an tel.

Sorkar thuchhuah tarlan danin, Covid-19 léng vangin state páwn aṭangin Mizoram mi zirlai tam tak an rawn haw a, hripui lêng a kian hun tur hriat a nih loh avangin zirlai tam tak chu zirna chhunzawm turin Mizoram pawna an chhuah theih a rinawm lo. College admission tih a hun tawh bawk si avangin Mizorama zirna chhunzawm tur kum dang zawng aiin an tam dawn a ni.

Zirlai an tam dawn avangin Mizorama college-te chu kum dang aia zirlai tam zawk lak dan ngaihtuah turin sorkarin a ngen tawh a; chutih rualin, zirtirtu lamah indaih lohna nasa tak a awm avangin harsatna a awm thei dawnin a lang a, college hrang hrangah assistant professor hna ruak 200 chuang a awm mek a ni.

Institute of Advanced Study in Education (IASE)-a zirtirtute leh thawktu dangte chu centrally sponsored scheme (CSS) hnuaia hlawh la an nih avangin harsatna nasa tak an tâwk mek tih tarlangin sorkar thuchhuah chuan, "Chief Minister ho hian IASE harsatna tawh pawh sawiho nghal a ni," a ti.