Khawchhakah lìr a nghîng

Mizoram khawchhak lam, Champhai district-ah July 28, Thawhlehni zan dar 8:10 khan magnitude 4.6-a náin lìr a nghîng leh a; June 22, 2020 aṭanga nimin thleng khan vawi 82 a nghîng tawha hriat a ni.

Khawbung Higher Secondary School principal H Lalnunmawia sawi danin, June 22, 2020 zing dar 4:10-a lirnghing hmasa ber aṭanga chhiarin vawi 82 a nghîng tawh a, Samthangah chuan vawi 106 a nghîng tawha chhinchhiahte pawh an awm. A khát tâwkin na deuh leh na vak loin a nghîng ṭhin. Farkawn leh Khawbung inkar leilet záwla riakte chuan leilung che thâwm ni âwm tak an hre deuh reng a, chu lai vel chu lîrnghîng inṭanna (epicentre) a ni ṭhina sawi a ni.

Hetihlai hian thuneitute'n an sawm angin Mizoram University, college leh MIRSAC-a leilung lam zir mithiamten Thawhlehni khan Khawbung an thleng a, hmun hrang hrang tlawhkualin, leilung chet dan an zirchiang dawn.