Central-in sum a pek tichingpenah Union MoS-in Mizoram sorkar a puh

Union Ministry of Minority Affairs minister of state John Barla chuan, sorkar laipuiin sum a pekte tichingpen ṭhinah Mizoram sorkar a puh a, Kristian ram inti ngam state-a thil thleng atan zahthlak a tih thu a sawi.

BJP, Mizoram Pradesh-in an pisaa December 1-3, 2022 chhunga training an buatsaih a hmanpuinaah Union Minister chuan, "Hmasawnna hna mipui hnena thlentir hi BJP-in kan kalphung a ni. Central-in Mizoram sum kan pek an tihchingpen ang hi BJP sorkarnaah chuan a awm ve dawn lo. Chuvangin, BJP sorkarah hmasawnna a thleng ṭhin a, Mizoramah pawh a thleng thuai dawn a ni," a ti.

John Barla sawi danin, a ministry enkawl aṭang ringawt pawhin infiamna, zirna, hostel sakna tur leh market sakna atante cheng vbc. 1,000 chuang Mizoram sorkar hnenah pek a ni tawh a; mahse, sum hman dan (utilisation certificate) an dilin, Mizoram sorkarin a nei lo.

Mipui hmasawnna tur sumte chu eng atan nge an hman tia zawhna siamin John Barla chuan, "An chhungte tihlen nan nge, inthlan awm leh tur atan an dahṭha zawk tih hriat a ni ta lo. Kristian ram inti ngam state-a thil thlengah chuan a zahthlak hle. BJP chuan sakhua tih bik nei loin, chi inthliarna nei loin, mi tinin an mamawh an chanvo an chan theih nan hma kan la mai ṭhin," a ti.

Minority Affairs Minister chuan, Kristian ni chungin BJP ticket hmangin Lok Sabha MP atan thlan tlin a nih thu sawiin, "Delhi-ah kalin ticket ka dil lo a, nimahsela, heng ka thlen theihna chu ka hnathawhte Delhi lamin an hriat avangin min rawn be mai a ni," a ti a, inthlanah Kristian ni lo vote 7,35,000 a hmuh thu a sawi.

BJP leh Kristianna chungchanga harsatna awm anga sawi chu politics-a inbeihna a nih thu sawiin John Barla chuan, "Eptu pawlte hian BJP ṭhatzia an hriat avang leh BJP-in Mizorama sorkarna kan chan chuan BJP ni lo party dangte'n chance an neih ve theih tawh loh an hlauh vangin BJP an sawisel ni berin a lang," a ti.

Inkhawmah hian Rajya Sabha MP leh BJP thupuangtu Sabitra Mangherita leh Assam minister Jayanta Malla Baruah te pawhin thu an sawi a ni.